ក្រុមហ៊ុន នៅតំបន់ហ្កាហ្សា ដែលដំណើរការរោងចក្រចម្រោះទឹកផ្គត់ផ្គង់ដល់ប្រជាជនជិតពាក់កណ្តាលនៃចំនួនប្រជាជននៃតំបន់នោះ បានបញ្ឈប់ប្រតិបត្តិការរបស់ខ្លួន ដើម្បីជាការតវ៉ា ចំពោះចាប់ឃុំខ្លួនបុគ្គលិកម្នាក់ ដោយក្រុមហាម៉ាស។

លោក Youssef Yassin សមាជិកក្រុមប្រឹក្សាភិបាលនៃក្រុមហ៊ុន Abdul Salam Yassin បាននិយាយថា ចំណាត់ការនេះនឹងប៉ះពាល់ដល់មនុស្សជាង ១លាននាក់ ដែលជាធម្មតាទទួលបានទឹកពីក្រុមហ៊ុន។

លោក Yassin បានបន្ថែមថា រថយន្តជាង ៧០គ្រឿងដែលផ្ទុកធុងទឹកឆ្លងកាត់ដែនដីនេះ ក៏បានបញ្ឈប់ប្រតិបត្តិការផងដែរ ដោយបង្កជាហានិភ័យរំខានដល់ការផ្គត់ផ្គង់បន្ថែមទៀត បន្ទាប់ពីបណ្តាញបំពង់បង្ហូរ បានរងការខូចខាតយ៉ាងធ្ងន់ធ្ងរ ក្នុងអំឡុងពេលមានសង្រ្គាម។

លោក Yassin បានប្រាប់សារព័ត៌មាន Reuters ថា៖ «ខ្ញុំដឹងថា វាគឺជាមហន្តរាយ ប៉ុន្តែការការពារបុគ្គលិករបស់យើង គឺសំខាន់ខ្លាំងណាស់»។ លោក Yassin បានបញ្ជាក់ថា ក្រុមហាម៉ាសមិនបានផ្តល់ហេតុផលឲ្យដឹងនោះឡើយ ជុំវិញការចាប់ខ្លួនកាលពីល្ងាចថ្ងៃចន្ទ (ទី១៧ ខែវិច្ឆិកា)។ ក្រុមហាម៉ាសមិនមានការអត្ថាធិប្បាយភ្លាមៗនោះទេ នៅពេលត្រូវបានទាក់ទងដោយសារព័ត៌មាន Reuters នៅថ្ងៃអង្គារនេះ។

ក្រុមហាម៉ាស បាននិងកំពុងអះអាងឡើងវិញបន្តិចម្ដងៗនូវការគ្រប់គ្រង នៅតំបន់ហ្កាហ្សា ដែលអ៊ីស្រាអែលបានដកកងកម្លាំងចេញ ខណៈការចរចាក្រោយសង្គ្រាម ជុំវិញការអនាគតរបស់ដែនដីនេះ មានល្បឿនយឺតណាស់។ មហាអំណាចបរទេសទាមទារឲ្យក្រុមនេះរំសាយអាវុធ និងចាកចេញពីរដ្ឋាភិបាល ប៉ុន្តែមិនទាន់យល់ស្របថា អ្នកណានឹងត្រូវជំនួសពួកគេឡើយ។ អ៊ីស្រាអែលបន្តគ្រប់គ្រងប្រមាណជាពាក់កណ្តាលនៃតំបន់ហ្កាហ្សាស្ទ្រីប៕