នាយករដ្ឋមន្ត្រីអ៊ីស្រាអែល លោក Benjamin Netanyahu នាថ្ងៃអង្គារ (ទី១៨ ខែវិច្ឆិកា) នេះ បានអំពាវនាវឲ្យមានការដកក្រុមហាម៉ាសចេញពីតំបន់ មួយថ្ងៃបន្ទាប់ពីក្រុមប្រឹក្សាសន្តិសុខអង្គការសហប្រជាជាតិ (UNSC) បានអនុម័តផែនការរបស់លោកប្រធានាធិបតី Donald Trump ដើម្បីបញ្ចប់សង្រ្គាមដែលផ្តល់ការលើកលែងទោសដល់ក្រុមសកម្មប្រយុទ្ធប៉ាឡេស្ទីនមួយនេះ។

លោក Netanyahu បានគាំទ្រជាសាធារណៈដល់ផែនការនេះ ក្នុងអំឡុងពេលមានទស្សនកិច្ច នៅសេតវិមានកាលពីចុងខែកញ្ញា។ តែយ៉ាងណាក្ដី ការកត់សម្គាល់ចុងក្រោយរបស់លោក ហាក់ដូចជាបង្ហាញថា មានភាពខុសគ្នាផ្ទុយពីសហរដ្ឋអាមេរិក នៅលើផ្លូវឆ្ពោះទៅមុខ។ ក្រុមហាម៉ាសក៏បានជំទាស់ទៅនឹងផ្នែកខ្លះនៃផែនការនេះផងដែរ។

បណ្ដាអ្នកការទូត លើកឡើងក្នុងលក្ខខណ្ឌឯកជនថា ការមានជំហរយ៉ាងម៉ឹងម៉ាត់ ទាំងពីភាគីអ៊ីស្រាអែល និងក្រុមហាម៉ាស បានធ្វើឲ្យលំបាកដល់ការជំរុញផែនការនេះ ដែលខ្វះពេលវេលាជាក់លាក់ ឬយន្តការអនុវត្តច្បាប់។ តែវាបានទទួលបានការគាំទ្រជាអន្តរជាតិយ៉ាងខ្លាំងក្លា។

នៅថ្ងៃអង្គារនេះ លោក Netanyahu បានបង្ហោះសារជាបន្តបន្ទាប់នៅលើបណ្ដាញសង្គម X ដើម្បីឆ្លើយតបទៅនឹងការបោះឆ្នោតរបស់អង្គការសហប្រជាជាតិ (UN)។ នៅក្នុងការបង្ហោះសារមួយ លោកបានសាទរចំពោះលោក Trump ហើយនៅក្នុងការបង្ហោះមួយផ្សេងទៀត លោកបានសរសេរថា រដ្ឋាភិបាលអ៊ីស្រាអែលជឿថា ផែនការនេះនឹងនាំទៅរកសន្តិភាព និងវិបុលភាព ព្រោះវាតម្រូវឲ្យ «គ្មានកម្លាំងយោធា រំសាយអាវុធ និងលុបបំបាត់អំពើហិង្សាទាំងស្រុង នៅតំបន់ហ្កាហ្សា»។

លោកបានបន្ថែមថា៖ «អ៊ីស្រាអែលចង់ឲ្យមានសន្តិភាព និងវិបុលភាព នៅក្នុងប្រទេសជិតខាងរបស់យើងទាំងអស់ ហើយអំពាវនាវឲ្យបណ្ដាប្រទេសជិតខាងចូលរួមជាមួយពួកយើង ក្នុងការបណ្តេញក្រុមហាម៉ាស និងអ្នកគាំទ្ររបស់ក្រុមនេះចេញពីតំបន់»។

នៅពេលត្រូវបានសួរថា តើនាយករដ្ឋមន្ត្រីចង់មានន័យយ៉ាងណា ពាក់ព័ន្ធនឹងការបណ្តេញក្រុមហាម៉ាសនេះ អ្នកនាំពាក្យបានប្រាប់ថា វានឹងមានន័យថា «ការធានាឲ្យបានថា គ្មានក្រុមហាម៉ាស នៅក្នុងតំបន់ហ្កាហ្សា ដូចដែលបានគូសបញ្ជាក់នៅក្នុងផែនការ ២០ចំណុច ហើយក្រុមហាម៉ាសមិនមានសិទ្ធិអំណាចក្នុងការគ្រប់គ្រងប្រជាជនប៉ាឡេស្ទីន នៅខាងក្នុងតំបន់ហ្កាហ្សាស្ទ្រីបឡើយ»៕