សេតវិមាន បាននិយាយកាលពីថ្ងៃអង្គារ (១៨ វិច្ឆិកា) ថា រដ្ឋបាលរបស់លោកប្រធានាធិបតីសហរដ្ឋអាមេរិក Donald Trump កំពុងចាត់វិធានការដើម្បីរុះរើក្រសួងអប់រំ ខណៈរដ្ឋបាលនេះកំពុងបោះជំហានទៅមុខលើការបង្រួញតួនាទីរបស់រដ្ឋាភិបាលសហព័ន្ធក្នុងវិស័យអប់រំ ហើយងាកទៅប្រគល់ការគ្រប់គ្រងវិស័យនេះឱ្យរដ្ឋនីមួយៗជំនួសវិញ។

ជាផ្នែកនៃកិច្ចខិតខំប្រឹងប្រែងនេះ ក្រសួងអប់រំអាមេរិកបានប្រកាសភាពជាដៃគូថ្មីជាមួយក្រសួងសហព័ន្ធចំនួន៤ ផ្សេងទៀត - ពោលគឺក្រសួងការងារ ការបរទេស មហាផ្ទៃ ព្រមទាំងក្រសួងសុខាភិបាលនិងសេវាប្រជាជន - ដើម្បីចែករំលែក ឬផ្ទេរមុខងារមួយចំនួនដែលខ្លួនកំពុងអនុវត្តនាពេលបច្ចុប្បន្ន។

ក្រសួងអប់រំបាននិយាយក្នុងសេចក្តីប្រកាសព័ត៌មានកាលថ្ងៃអង្គារថា វិធីសាស្រ្តថ្មីទាំងនេះនឹង "សម្រួលសកម្មភាពអប់រំរបស់សហព័ន្ធលើកម្មវិធីដែលតម្រូវដោយច្បាប់ កាត់បន្ថយបន្ទុករដ្ឋបាល ហើយផ្តោតលើកម្មវិធីនិងសកម្មភាពនានាឡើងវិញ ដើម្បីបម្រើដល់សិស្សនិស្សិតឱ្យកាន់តែប្រសើរឡើង"។

ចំណាត់ការដែលរំពឹងទុកជាយូរមកហើយនេះ បានជំរុញឱ្យមានប្រតិកម្មខ្លាំងៗ រួមទាំងកំហឹងពីសមាជិកបក្សប្រជាធិបតេយ្យដែលបានរិះគន់ថា រដ្ឋបាលកំពុងតែដើររំលងសភា។ ដោយឡែក ខាងបក្សសាធារណរដ្ឋវិញបានអបអរការប្រកាសនេះថាជាវឌ្ឍនភាពជាក់ស្តែងក្នុងគោលដៅបង្រួញតួនាទីរដ្ឋាភិបាលសហព័ន្ធ។ កាលពីខែមីនា កន្លងទៅ លោក Trump បាននិយាយរួចមកហើយថា លោកមានបំណងបំពេញសន្យាយុទ្ធនាការមួយរបស់លោកឱ្យបានពេញលេញទៅកាន់អ្នកអភិរក្សនិយម ដោយអំពាវនាវឱ្យបិទក្រសួងអប់រំនេះ៕