ឧត្ដរមានជ័យ៖ អភិបាលខេត្តឧត្ដរមានជ័យ បានអំពាវនាវដល់ប្រជាពលរដ្ឋ ដែលមិនទាន់បានចាក់វ៉ាក់សាំងដូសទី៣ និងទី៤ ឱ្យទៅចាក់ឱ្យបានគ្រប់ៗគ្នា ដើម្បីបង្កើនភាពស៊ាំក្នុងសហគមន៍ ទប់ទល់នឹងជំងឺកូវីដ-១៩ ពិសេសប្រភេទបំប្លែងថ្មី អូមីក្រុង។

ឯកឧត្តម ប៉ែន កុសល្យ អភិបាលខេត្តឧត្តរមានជ័យ និងជាប្រធានគណៈកម្មកាចំពោះកិច្ចការចាក់ វ៉ាក់សាំងខេត្ត ​បានឱ្យដឹងថា ខណៈពេលនេះ អូមីក្រុង ត្រូវបានរកឃើញក្នុងសហគមន៍ខេត្តជាប់​ជាយដែនមួយនេះហើយ ដូច្នេះប្រជាពលរដ្ឋ ត្រូវបង្កើនការប្រុងប្រយ័ត្នបង្ការខ្លួនកុំឱ្យឆ្លង ដោយ​ត្រូវ​អនុវត្តឱ្យបានខ្ជាប់ខ្ជួននូវិធានការសុខាភិបាល​ និងវិធានការបីកុំ ​បីការពារ ពិសេសគឺត្រូវទៅ​ចាក់វ៉ាក់​សាំង​ដូសជំរុញទី៣ ​និងទី៤ ​ឱ្យបានគ្រប់គ្នា បើម្បីបង្កើនអង់ទីគ័រក្នុងខ្លួនទប់ទល់​នឹង​មេរោគបំប្លែង​ថ្មីនេះ​។

ឯកឧត្តម ​បានបញ្ជាក់ថា ក្រុមគ្រូពេទ្យ​ កំពុងរង់ចាំចាក់វ៉ាក់សាំងជូន​ប្រជាពលរដ្ឋគ្រប់ពេលវេលា នៅ​តាមទីតាំងដែលកំណត់រៀបចំរួចរាល់។ ឯកឧត្តម ក៏បានធ្វើការអំពាវនាវដល់ប្រជាពលរដ្ឋទាំងអស់ កាត់​បន្ថយការជួបជុំដែលមានមនុស្សច្រើន ដែល​មានចរិត​ជា​ការ​ឆ្លងជំងឺកូវីដ-១៩៕អត្ថបទ៖ ឃិន សារិទ្ធ