មានការលុបចោលសំបុត្រជាច្រើនបន្ទាប់ពីទីក្រុងប៉េកាំងបានចេញការជូនដំណឹងអំពីការធ្វើដំណើរសម្រាប់ពលរដ្ឋចិនដែលមានគម្រោងទៅទស្សនាប្រទេសជប៉ុន បន្ទាប់ពីការអត្ថាធិប្បាយខុសឆ្គងរបស់នាយករដ្ឋមន្ត្រីជប៉ុនលោកស្រី Sanae Takaichi លើកោះតៃវ៉ាន់ ដែលទាក់ទាញការតវ៉ាយ៉ាងខ្លាំងពីប្រទេសចិន។ ឥឡូវនេះប្រទេសកូរ៉េខាងត្បូងបានលេចចេញជាគោលដៅក្រៅប្រទេសដ៏ពេញនិយមបំផុតសម្រាប់អ្នកធ្វើដំណើរចិន។

ក្រុមហ៊ុន Tuniu Corp ជាភ្នាក់ងារទេសចរណ៍អនឡាញមួយដែលមានមូលដ្ឋាននៅទីក្រុង Nanjing រដ្ឋធានីរបស់ខេត្តជាំងស៊ូ (Jiangsu)បាននិយាយថា ការលុបចោលដំណើរកម្សាន្តជាក្រុមទៅកាន់ប្រទេសជប៉ុនដែលបានកក់នៅលើវេទិការបស់ខ្លួនគឺខ្ពស់ជាងធម្មតា។ ក្រុមហ៊ុនទេសចរណ៍ Spring Tour ដែលមានមូលដ្ឋាននៅទីក្រុងសៀងហៃ បាននិយាយថា ខ្លួនកំពុងតាមដានស្ថានភាពយ៉ាងដិតដល់។Spring Airlines ដែលជាក្រុមហ៊ុនអាកាសចរណ៍ មានមូលដ្ឋាននៅទីក្រុងសៀងហៃ ដែលដំណើរការជើងហោះហើរច្រើនរវាងទីក្រុងសៀងហៃ និងទីក្រុងផ្សេងៗរបស់ជប៉ុនបានលុបចោលជើងហោះហើរមួយចំនួនរបស់ខ្លួន។

ក្រុមហ៊ុន Spring Airlines និយាយថា ការលុបចោលជើងហោះហើរគឺស្របតាមផែនការមុនៗរបស់ខ្លួន។នៅពេលសួរថាតើជើងហោះហើរទៅកាន់ប្រទេសជប៉ុនជាបន្តបន្ទាប់នឹងត្រូវកាត់បន្ថយ ឬលុបចោលដែរឬទេ ក្រុមហ៊ុនអាកាសចរណ៍នេះនិយាយថា ខ្លួននឹងតាមដាន និងវាយតម្លៃយ៉ាងដិតដល់នូវការផ្លាស់ប្តូរសំបុត្រ និងគំរូនៃការលុបចោល មុនការសម្រេចចិត្ត។ក្រុមហ៊ុនអាកាសចរណ៍ក្នុងស្រុកធំៗជាច្រើនរួមមានAir China, China Southern Airlines, China Eastern Airlines, Hainan Airlines និងSichuan Airlines ចេញសេចក្តីជូនដំណឹងជាសាធារណៈដោយបញ្ជាក់ថា អ្នកដំណើរដែលកាន់សំបុត្រ ចេញសម្រាប់ការធ្វើដំណើរមុនថ្ងៃទី ៣១ ខែធ្នូ មានសិទ្ធិទទួលបានការសងប្រាក់វិញគ្រប់ចំនួន ឬការកំណត់ពេលវេលាឡើងវិញសម្រាប់ជើងហោះហើរទៅមកពីជប៉ុន៕