រដ្ឋមន្ត្រីការបរទេសទួរគី លោក Hakan Fidan បាននិយាយកាលពីថ្ងៃអង្គារថា ជនភៀសខ្លួនស៊ីរីជាង ៥៥០.០០០ នាក់ បានវិលត្រឡប់មកពីប្រទេសទួរគី ទៅប្រទេសស៊ីរីវិញ ចាប់តាំងពីថ្ងៃទី ០៨ ខែធ្នូ ឆ្នាំ ២០២៤ បន្ទាប់ពីរដ្ឋាភិបាលមុន បានដួលរលំ។

លោក Fidan បាននិយាយក្នុងអំឡុងពេលសម័យប្រជុំសភាស្តីពីថវិកាឆ្នាំ ២០២៦ ថា ដោយសារការវិវត្ត ទាំងនេះ ជនជាតិស៊ីរីជាង ៥៥០.០០០ នាក់ បានវិលត្រឡប់ទៅប្រទេសរបស់ពួកគេវិញ ចាប់តាំងពីថ្ងៃទី 0៨ ខែធ្នូ ឆ្នាំ ២០២៤»។

ដោយសម្លឹងមើលទៅមុខ លោក Fidan បានសង្កត់ធ្ងន់លើសារៈសំខាន់នៃការរក្សាបូរណភាពទឹកដីរបស់ប្រទេសស៊ីរី និងការបង្កើតសន្តិសុខរយៈពេលវែង។

លោកបានអំពាវនាវឲ្យមានកម្ទេចសមាសភាពភេរវករទាំងអស់ ការបង្រួបបង្រួមក្រុមប្រដាប់អាវុធ នៅក្រោមកងទ័ពជាតិតែមួយ និងការបង្កើតរដ្ឋាភិបាលចម្រុះមួយ ដែលមានតំណាងគ្រប់ផ្នែកទាំងអស់នៃសង្គមស៊ីរី។

លោកក៏បានអំពាវនាវឲ្យមានការគាំទ្រពីអន្តរជាតិសម្រាប់ការកសាងឡើងវិញរបស់ប្រទេសស៊ីរីផងដែរ។ លោក Fidan បានបញ្ជាក់ថា៖««ដោយមានការគាំទ្រយ៉ាងសកម្មពីសហគមន៍ពិភពលោក យើងមានគោលបំណងធានានូវផលចំណេញប្រកបដោយចីរភាព តាមរយៈការកសាងឡើងវិញ និងការអភិវឌ្ឍសេដ្ឋកិច្ច»៕