កាសែត Financial Times (FT) បានរាយការណ៍ដោយដកស្រង់សម្តីមន្ត្រីសហភាពអឺរ៉ុប មុនពេលការប្រកាសដែលរំពឹងទុកពីទីក្រុងប្រ៊ុចសែលនៅថ្ងៃពុធនេះ អំពីសំណើថ្មី ដើម្បីបង្កើនប្រសិទ្ធភាពនៃការចល័តយោធាថា ប្រទេសនានានៅសហភាពអឺរ៉ុប ចង់កាត់បន្ថយពេលវេលា ដើម្បីបញ្ជូនកងទ័ពពីភាគខាងលិចនៃទ្វីបអឺរ៉ុប ទៅភាគខាងកើតរបស់ខ្លួនពី ៤៥ថ្ងៃបច្ចុប្បន្ន មកត្រឹមរយៈពេល ៥ឬ ៣ថ្ងៃ។

យោងតាមពួកគេ គោលដៅចុងក្រោយ គឺដើម្បីធានាការបញ្ជូនកងទ័ព ឧបករណ៍ និងគ្រាប់រំសេវ ឲ្យបានយ៉ាងឆាប់ពីលោកខាងលិច ជាកន្លែងដែលកងកម្លាំងណាតូភាគច្រើនឈរជើង ទៅកាន់ចូលរួមជាកងកម្លាំងការពារសម្ព័ន្ធមិត្តនៅភាគខាងកើតនៃសម្ព័ន្ធភាពយោធានេះទូទាំងទ្វីបអឺរ៉ុប។ បច្ចុប្បន្ន ផ្លូវដែក និងផ្លូវហាយវេ មិនបំពេញតាមតម្រូវការចាំបាច់ទេ។

យោងតាមលោក Alexander Solfrank ប្រធានបញ្ជាការប្រតិបត្តិការថ្មីរបស់កងកម្លាំងប្រដាប់អាវុធនៃសាធារណរដ្ឋសហព័ន្ធអាល្លឺម៉ង់ ដែលទទួលខុសត្រូវក្នុងការរៀបចំអាល្លឺម៉ង់សម្រាប់តួនាទីកណ្តាល ក្នុងប្រតិបត្តិការ សមាសភាពនីមួយៗ គួរតែដំណើរការទៅដោយរលូន យោងតាមលោក គោលដៅ គឺដើម្បីផ្ញើសញ្ញាការពារដ៏មានឥទ្ធិពល ទៅកាន់ទីក្រុងមូស្គូ៖ យើងដឹងពីអ្វីដែលអ្នកកំពុងធ្វើ ហើយយើងត្រៀមរួចជាស្រេច។

យោងតាមអ្នកការទូតរបស់អង្គការណាតូ សម្ព័ន្ធភាពយោធានេះ មានគម្រោងពន្លឿនពេលវេលា បញ្ជូន កងទ័ពប្រហែល ២០០.០០០ នាក់ រថក្រោះជិត ១.៥០០ គ្រឿង និងរថពាសដែកជាង ២.៥០០ គ្រឿងផ្សេងទៀត ពីសហរដ្ឋអាមេរិក កាណាដា និងចក្រភពអង់គ្លេស ឆ្លងកាត់ទ្វីបអឺរ៉ុប៕