ទីភ្នាក់ងារសារព័ត៌មានក្យូដូ និង NHK របស់ជប៉ុន បានរាយការណ៍នៅថ្ងៃពុធ (១៩ វិច្ឆិកា) នេះថា ប្រទេសចិន បានជូនដំណឹងដល់ទីក្រុងតូក្យូថា ខ្លួននឹងហាមឃាត់ការនាំចូលអាហារសមុទ្រជប៉ុនទាំងអស់ ស្របពេលជម្លោះការទូតកាន់តែខ្លាំងឡើងរវាងប្រទេសមានសេដ្ឋកិច្ចធំជាងគេទាំងពីររបស់អាស៊ី។

កាលពីដើមឆ្នាំនេះ ទីក្រុងប៉េកាំង បានដកការបន្ធូរបន្ថយមួយផ្នែកលើការរឹតត្បិតនាំចូលគ្រឿងសមុទ្ររបស់ជប៉ុន ជុំវិញការបញ្ចេញទឹកដែលធ្វើប្រព្រឹត្តិកម្មរួច ចេញពីរោងចក្រថាមពលហ្វ៊ូគូស៊ីម៉ា ដែលឈប់ដំណើរការ ចូលទៅសមុទ្រក្នុងឆ្នាំ២០២៣។ យោងតាមទិន្នន័យផ្លូវការបានឱ្យដឹងថា មុនការហាមឃាត់នោះ ចិន បាននាំចូលច្រើនជាង ១ភាគ៥ នៃការនាំចេញគ្រឿងសមុទ្រទាំងអស់របស់ជប៉ុន។

សារព័ត៌មានក្យូដូ បានរាយការណ៍ដោយសម្អាងដល់ប្រភពថា ចិន បានជូនដំណឹងប្រាប់ជប៉ុនថា ការដាក់បម្រាមឡើងវិញនេះគឺដោយសារតែតម្រូវការត្រួតពិនិត្យបន្ថែមទៀត។ ការវិវត្តនេះកើតមានឡើងបន្ទាប់ពីជម្លោះការទូតកាន់តែស៊ីជម្រៅរវាងប្រទេសជិតខាងទាំងពីរ ជុំវិញការលើកឡើងរបស់នាយករដ្ឋមន្ត្រីជប៉ុន លោកស្រី Sanae Takaichi កាលពីដើមខែនេះអំពីកោះតៃវ៉ាន់ ដែលចិន អះអាងសិទ្ធិថាជាទឹកដីរបស់ខ្លួន។

ក្រសួងពាណិជ្ជកម្ម និងរដ្ឋបាលគយរបស់ចិន មិនទាន់ឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ចំណែកក្រសួងកសិកម្មជប៉ុន ក៏មិនបានធ្វើអត្ថាធិប្បាយភ្លាមៗដែរ៕