​អាមេរិក៖ ការ​បាញ់​ប្រហារ​បាន​ផ្ទុះ​ឡើង​ នៅ​ឯ​ពិធីជប់លៀង​មួយ​នៅ​តំបន់​ទីប្រជុំជន South Side របស់​ទីក្រុង ​Chicago ​កាលពី​ព្រឹក​ថ្ងៃអាទិត្យ​ដោយ​សម្លាប់​មនុស្ស ២​នាក់​ និង ១៣​នាក់​ផ្សេង​ទៀត​រង​របួស​ ជា​អ្វី​ដែល​ក្រុម​អាជ្ញាធរ​និយាយ​ថា ​អាច​ជា​ការ​បាញ់​ប្រហារ​ទាក់ទង​នឹង​ក្រុម​ទំនើង​។​

​នគរបាល​បាន​និយាយ​ថា ​ក្រុម​មន្ត្រី​បាន​ឆ្លើយតប​នៅ​ម៉ោង​ប្រហែល ៤ និង ៤០​នាទី​ព្រឹក​ទៅកាន់​សេចក្តី​រាយការណ៍​អំពី​ការ​បាញ់​ប្រហារ​ នៅ​ឯ​ក្រុមហ៊ុន​រថយន្ត​សណ្ដោង​មួយ​កន្លែង ​ជាទី​ដែល​មាន​ពិធី​ជប់​លៀង​។ លោក​ Jose Jara ​អ្នកនាំពាក្យ​ស្នងការ​នគរបាល ​បាន​និយាយ​នៅ​ក្នុង​សេចក្តី​ថ្លែងការណ៍​មួយ​ថា ​ការ​បាញ់​ប្រហារ​នោះ​បាន​បណ្ដាល​ឲ្យ​មនុស្ស​ ២​នាក់​ស្លាប់​ដែល​មាន​អាយុ​ចន្លោះ​ពី ២០ និង ៤៤​ឆ្នាំ​។​ ​ក្រុម​អាជ្ញាធរ​ដែល​បាន​រាយការណ៍​ដំបូង​ថា ​មនុស្ស ១០​នាក់​ត្រូវ​បាន​គេ​បាញ់​ ប៉ុន្តែ​ក្រោយមក​បាន​កើន​ដល់ ១២​នាក់​ បន្ទាប់មក​ថា​មាន​មនុស្ស ១៥​នាក់ ​អ្នកនាំពាក្យ​នាយកដ្ឋាន​ពន្លត់​អគ្គិភ័យ​ លោក Larry Merritt បាន​ប្រាប់​សារព័ត៌មាន ​Chicago Sun-Times ថា ​អ្នក​រង​របួស ៧​នាក់​ត្រូវ​បាន​បញ្ជូន​ទៅ​កាន់​មន្ទីរពេទ្យ ​ក្នុង​ស្ថានភាព​ធ្ងន់ធ្ងរ​។ ចំណែក​អ្នក​ផ្សេងទៀតបាន​ទៅកាន់​មន្ទីរពេទ្យ​ដោយ​ខ្លួនឯង​ ឬ​ត្រូវ​បាន​ដឹក​គេ​ដឹកជញ្ជូន ដែល​ពិបាក​ដឹង​ពី​ចំនួន​អ្នករបួស​ពិតប្រាកដ​។​

​គួរ​ឲ្យ​ដឹង​ថា មនុស្ស​ជាង ៧៦០​នាក់​ត្រូវ​បាន​សម្លាប់​នៅ​ក្នុង​ទីក្រុង Chicago កាលពី​ឆ្នាំ២០២០​ ដែល​ជា​ចំនួន​មនុស្សឃាត​សរុប​ខ្ពស់​ជាងគេ​បំផុត​ក្នុង​ទីក្រុង​នេះ ​ក្នុង​រយៈពេល​ជាង ​២០​ឆ្នាំ​មក​នេះ។ នគរបាល​បាន​ដាក់​ការ​ស្ដីបន្ទោស​ ការ​ស្លាប់​ភាគច្រើន​បណ្ដាល​មក​ពី​ជម្លោះ​រវាង​ក្រុម​ជន​ទំនើង​៕

អត្ថបទ៖ សុខមាន