មន្រ្តីជាន់ខ្ពស់របស់ទីក្រុងគីវ បានប្រាប់សារព័ត៌មានរ៉យទ័រថា អ៊ុយក្រែន កំពុងជំរុញសម្ព័ន្ធមិត្តអឺរ៉ុប ឱ្យធ្វើការសម្រេចចិត្តខាងនយោបាយមួយនៅខែក្រោយនេះ ដើម្បីបញ្ចេញប្រាក់កម្ចីចំនួន ១៦៣ពាន់លានដុល្លារ ដែលស្នើឡើងដោយផ្អែកលើទ្រព្យសម្បត្តិរដ្ឋរបស់រុស្ស៊ី ដែលត្រូវបង្កកនៅលោកខាងលិច។

កាលពីខែតុលា មេដឹកនាំអឺរ៉ុបបានបរាជ័យក្នុងការយល់ព្រមលើ "ប្រាក់កម្ចីឥតការប្រាក់" សម្រាប់ទីក្រុងគីវ ហើយមានផែនការពិភាក្សារឿងនេះម្តងទៀតនៅក្នុងកិច្ចប្រជុំកំពូលមួយ នៅថ្ងៃទី១៨ ខែធ្នូ ខាងមុខនេះ ដោយអ៊ុយក្រែនត្រូវការការគាំទ្រផ្នែកហិរញ្ញវត្ថុដ៏ធំជាលើកដំបូងរបស់ខ្លួន ចាប់ពីត្រីមាសទីពីរនៃឆ្នាំ២០២៦ តទៅ។

មន្ត្រីជាន់ខ្ពស់ក្នុងរដ្ឋបាលប្រធានាធិបតីអ៊ុយក្រែន Volodymyr Zelenskyy គឺលោកស្រី Iryna Mudra បានប្រាប់រ៉យទ័រថា កិច្ចប្រជុំកំពូលនោះមើលទៅជាឱកាសចុងក្រោយហើយសម្រាប់អឺរ៉ុប នៅឆ្នាំនេះ ក្នុងការយល់ព្រមផ្តល់ឥណទានឱ្យអ៊ុយក្រែន ជាអ្វីដែលរុស្ស៊ីព្រមានថា នឹងមាន "ការឆ្លើយតបដ៏ឈឺចាប់"។ លោកស្រីនិយាយថា អ៊ុយក្រែនរំពឹងថា សម្ព័ន្ធមិត្តអឺរ៉ុបរបស់ខ្លួន នឹងអាចកំណត់រចនាសម្ព័ន្ធ និងអភិបាលកិច្ច ដែលតាមរយៈនោះ មូលនិធិនឹងត្រូវបានផ្តល់ឱ្យទីក្រុងគីវ។

ក្រុមអ្នកវិភាគផ្នែកសេដ្ឋកិច្ចបានព្រមានថា ជាមួយនឹងការរំពឹងទុកតិចតួចនៃជំនួយដោយផ្ទាល់របស់សហរដ្ឋអាមេរិកក្រោមការដឹកនាំរបស់លោកប្រធានាធិបតី Donald Trump អ៊ុយក្រែនអាចនឹងអស់ប្រាក់ក្នុងកំឡុងត្រីមាសទីមួយនៃឆ្នាំក្រោយនេះ ប្រសិនបើជំនួយថ្មីរបស់អឺរ៉ុប មិនសម្រេចទេនោះ៕