សេចក្ដីរាយការណ៍របស់សារព័ត៌មាន AP ដែលចេញផ្សាយនៅថ្ងៃអង្គារ (១៨ វិច្ឆិកា) បាននិយាយថា ចាប់តាំងពីសង្រ្គាមនៅអ៊ុយក្រែន ផ្ទុះឡើងក្នុងខែកុម្ភៈ ឆ្នាំ២០២២មក បុគ្គលិកអគ្គិសនីយ៉ាងតិច ១៦០នាក់ ត្រូវបានសម្លាប់ ហើយលើសពី ៣០០នាក់ បានរងរបួស។ ទោះជាគ្រោះថ្នាក់បែបនេះក៏ដោយ ក៏បុគ្គលិករាប់ម៉ឺននាក់នៅតែចេញដំណើរជារៀងរាល់ថ្ងៃ ទាំងភាពភ័យខ្លាច នៅក្នុងបេសកកម្មដើម្បីស្រោចស្រង់ពលរដ្ឋអ៊ុយក្រែន ពីភាពងងឹត។

ជិត ៤ឆ្នាំនៃប្រតិបត្តិការយោធារុស្ស៊ី ការរក្សាបណ្ដាញអគ្គិសនីរបស់អ៊ុយក្រែន បានក្លាយទៅជាសមរភូមិផ្សេងមួយទៀត ដែលក៏ប្រែប្រួលតាមស្ថានភាពប្រយុទ្ធនៅជួរមុខ។ វិស្វករអ៊ុយក្រែន បានជួសជុលម៉ាស៊ីនត្រង់ស្វូរ កុងតាក់ និងខ្សែភ្លើង ដែលរុស្ស៊ី វាយប្រហារម្តងហើយម្តងទៀតឥតឈប់ឈរ។

បុគ្គលិកថាមពលអ៊ុយក្រែនម្នាក់បានរៀបរាប់ប្រាប់ AP ថា៖ «មានមនុស្សជាច្រើនតែងសួរថា តើបុគ្គលិករោងចក្រថាមពលអ៊ុយក្រែន លាក់ខ្លួនក្នុងជម្រកគ្រាប់បែកទេនៅពេលរុស្ស៊ី វាយសន្ធាប់លើប្រព័ន្ធថាមពល។ ចម្លើយគឺថា ប្រសិនបើប្រតិបត្តិករទួរប៊ីនទាំងអស់លាក់ខ្លួនក្នុងពេលវាយប្រហារ នោះនឹងពុំមានអគ្គិសនីប្រើទេ ហើយបើបុគ្គលិកថាមពលលាក់ខ្លួន តើបានអ្នកណាធ្វើការងារនេះ?»

ក្នុងប៉ុន្មានសប្តាហ៍ថ្មីៗនេះ អ៊ុយក្រែន បានប្រឈមការវាយប្រហារកាន់តែអាក្រក់ឡើងពីរុស្ស៊ី ដោយដាក់គោលដៅលើហេដ្ឋារចនាសម្ព័ន្ធថាមពលរបស់ខ្លួន ក្នុងពេលរដូវរងាខិតជិតមកដល់៕