ចក្រភពអង់គ្លេស មានផែនការកសាងបណ្តាញរោងចក្រផលិតគ្រាប់រំសេវថ្មីមួយដើម្បីជំរុញការត្រៀមខ្លួនប្រយុទ្ធ ដោយនេះជាជំហានមួយមានគោលបំណងស្ដារឡើងវិញនូវការផលិតគ្រឿងផ្ទុះយោធាក្នុងស្រុកជាលើកដំបូង ក្នុងរយៈពេលជិត ២ទសវត្សរ៍។

រដ្ឋមន្ត្រីក្រសួងការពារជាតិ លោក John Healey នឹងធ្វើសេចក្ដីប្រកាសនៅថ្ងៃពុធ (១៩ វិច្ឆិកា) នេះ អំពីផែនការសម្រាប់លទ្ធភាពនៃទីតាំងថ្មីទាំងនោះ ហើយបញ្ជាក់ថា ការសាងសង់រោងចក្រដំបូងគេ រំពឹងថានឹងចាប់ផ្តើមនៅឆ្នាំ២០២៦។

រដ្ឋាភិបាលអង់គ្លេស ក៏ប្រកាសព័ត៌មានលម្អិតសំខាន់ៗផ្សេងទៀតថា កាលពីខែមិថុនា ខ្លួនបានប្តេជ្ញាចិត្តក្នុងទឹកប្រាក់ ១,៥ពាន់លានផោន (១,៩៧ ពាន់លានដុល្លារ) នៃការវិនិយោគបន្ថែមសម្រាប់គ្រាប់រំសេវ និងសមាសធាតុពាក់ព័ន្ធ ដោយយ៉ាងហោចណាស់មានទីតាំងដែលអាចទៅរួចចំនួន ១៣កន្លែង សម្រាប់រោងចក្របែបនេះ ហើយការសាងសង់ដំបូង ត្រូវរំពឹងទុកនៅឆ្នាំក្រោយ។

សេចក្ដីប្រកាសបន្តថា រោងចក្រនឹងផលិតគ្រាប់រំសេវ ឈ្នួនបំផ្ទុះ គ្រឿងផ្ទុះ និងជំនាញបច្ចេកទេសបំផ្ទុះ សម្រាប់កងទ័ពអង់គ្លេស និងគាំទ្រដល់អ៊ុយក្រែន ហើយការងារថ្មីយ៉ាងតិចចំនួន ១.០០០កន្លែង ត្រូវបានរំពឹងទុក។ លើសពីនេះ អង់គ្លេសនិយាយថា រោងចក្រដ្រូនថ្មីចំនួន ២កន្លែង ត្រូវបានបើកនៅសប្តាហ៍នេះក្នុងភាគនិរតីដែនដីអង់គ្លេស ជាផ្នែកមួយនៃកិច្ចព្រមព្រៀងកំណើនផ្នែកការពារ ដែលគាំទ្រដោយទឹកប្រាក់ ២៥០លានផោន (ឬ ៣២៨,៨៨ លានដុល្លារអាមេរិក)៕