តំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិ (UN) កាលពីថ្ងៃអង្គារ (ទី១៨ ខែវិច្ឆិកា) បានលើកឡើងថា ប្រទេសជប៉ុន «មិនមានលក្ខណៈសម្បត្តិគ្រប់គ្រាន់» នោះឡើយ ក្នុងការស្វែងរកកៅអីជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ (UNSC)។

ក្នុងអំឡុងពេលថ្លែងនៅឯការជជែកដេញដោលប្រចាំឆ្នាំរបស់មហាសន្និបាត UN ស្តីពីកំណែទម្រង់ក្រុមប្រឹក្សាសន្តិសុខ លោក Fu Cong បាននិយាយថា កាលពីពេលថ្មីៗនេះ នាយករដ្ឋមន្ត្រីជប៉ុន លោកស្រី Sanae Takaichi បានធ្វើសេចក្តីថ្លែងការណ៍ «ដ៏គួរឲ្យភ្ញាក់ផ្អើល និងបង្កហេតុ» ជុំវិញបញ្ហាកោះតៃវ៉ាន់ នៅសភា ដោយអះអាងថា «ហេតុការណ៍គ្រាអាសន្ន នៅកោះតៃវ៉ាន់» អាចជា «ស្ថានភាពគំរាមកំហែងដល់ការរស់រានមានជីវិត» សម្រាប់ប្រទេសជប៉ុន។ លោកស្រីបានបញ្ជាក់ថា ជប៉ុនអាចនឹងប្រើនូវអ្វីដែលហៅថា សិទ្ធិការពារខ្លួនសមូហភាព ដើម្បីជ្រៀតជ្រែកផ្នែកយោធា នៅច្រកសមុទ្រតៃវ៉ាន់។

លោក Fu បានសង្កត់ធ្ងន់ថា៖ «ការលើកឡើងរបស់លោកស្រី Sanae Takaichi ជុំវិញបញ្ហាកោះតៃវ៉ាន់ គឺជាកំហុសឆ្គង និងគ្រោះថ្នាក់ខ្លាំង។ ប្រទេសនេះបង្កើតនូវការជ្រៀតជ្រែកយ៉ាងធ្ងន់ធ្ងរ នៅក្នុងកិច្ចការផ្ទៃក្នុងរបស់ប្រទេសចិន និងជាការរំលោភយ៉ាងធ្ងន់ធ្ងរលើគោលការណ៍ចិនតែមួយ និងស្មារតីនៃឯកសារនយោបាយទាំង ៤ រវាងប្រទេសចិន និងជប៉ុន»។

លោកបេសកជនចិនរូបនេះបានបន្ថែមថា ពួកគេគឺជាអ្នកមើលស្រាល ចំពោះយុត្តិធម៌អន្តរជាតិ ធ្វើឲ្យខូចដល់សណ្តាប់ធ្នាប់អន្តរជាតិក្រោយសង្គ្រាម មិនផ្ដល់តម្លៃដល់បទដ្ឋានជាមូលដ្ឋាននៃទំនាក់ទំនងអន្តរជាតិ ហើយបង្ហាញឲ្យឃើញនូវការចាកចេញដោយឥតលាក់លៀមពីការប្តេជ្ញាចិត្តរបស់ជប៉ុន ចំពោះការអភិវឌ្ឍដោយសន្តិភាព។

លោកឯកអគ្គរដ្ឋទូតបានបញ្ជាក់ថា៖ «ប្រទេសបែបនេះ គឺមិនមានលក្ខណៈសម្បត្តិគ្រប់គ្រាន់នោះឡើយ ក្នុងការស្វែងរកកៅអីអចិន្ត្រៃយ៍ នៅក្នុងក្រុមប្រឹក្សាសន្តិសុខ»៕