ក្នុងរង្វង់រយៈពេលប៉ុន្មានថ្ងៃដែលប្រទេសចិនជំរុញឲ្យពលរដ្ឋរបស់ខ្លួនកុំធ្វើដំណើរទៅជប៉ុន ដោយសារតែមានជម្លោះការទូត ប្រតិបត្តិករទេសចរណ៍ដែលមានមូលដ្ឋាននៅទីក្រុងតូក្យូ East Japan International Travel Service បានបាត់បង់ ៨០ភាគរយនៃការកក់ទុក សម្រាប់ពេលវេលានៅសល់នៃឆ្នាំនេះ។

ក្រុមហ៊ុនដ៏តូចនេះ ដែលមានជំនាញក្នុងការរៀបចំដំណើរទេសចរណ៍ជាក្រុមភាគច្រើន សម្រាប់អតិថិជនចិន កំពុងប្រឈមនឹងប្រតិកម្មយ៉ាងខ្លាំង ដែលគំរាមកំហែងផ្ដល់ផលប៉ះពាល់ដ៏ធំធេងដល់សេដ្ឋកិច្ចរបស់ជប៉ុន ដែលជាសេដ្ឋកិច្ចធំជាងគេទី៤ របស់ពិភពលោក។

ការព្រមានអំពីការធ្វើដំណើរដែលបង្កឡើងដោយការលើកឡើងរបស់នាយករដ្ឋមន្ត្រីជប៉ុន លោកស្រី Sanae Takaichi ពាក់ព័ន្ធនឹងបញ្ហាកោះតៃវ៉ាន់ ជាកោះស្វ័យគ្រប់គ្រងដោយលទ្ធិប្រជាធិបតេយ្យដែលត្រូវបានអះអាងសិទ្ធិដោយចិន បានឃើញមានការលុបចោលជើងហោះហើរជាបន្តបន្ទាប់ និងធ្វើឲ្យភាគហ៊ុនទាក់ទងនឹងវិស័យទេសចរណ៍នៅជប៉ុន បានរងប៉ះពាល់។

អនុប្រធានរបស់ក្រុមហ៊ុន East Japan International Travel Service គឺលោក Yu Jinxin បាននិយាយថា៖ «នេះគឺជាការខាតបង់ដ៏ធំ សម្រាប់ពួកយើង»។

គួរបញ្ជាក់ថា យោងតាមក្រុមប្រឹក្សាទេសចរណ៍ និងទេសចរណ៍ពិភពលោក (World Travel & Tourism Council) បានឲ្យដឹងថា វិស័យទេសចរណ៍មានប្រហែល ៧ភាគរយនៃផលិតផលក្នុងស្រុកសរុប (GDP) របស់ប្រទេសជប៉ុន ហើយជាកត្តាជំរុញដ៏សំខាន់នៃកំណើន ក្នុងរយៈពេលប៉ុន្មានឆ្នាំចុងក្រោយនេះ។

វិទ្យាស្ថានស្រាវជ្រាវ Nomura បានប៉ាន់ប្រមាណថា ការធ្វើពហិការនេះ អាចបណ្តាលឲ្យមានការខាតបង់ប្រហែល ២,២សែនកោដិយ៉េន (១៤,២៣ពាន់លានដុល្លារ) ជារៀងរាល់ឆ្នាំ។ ភាគហ៊ុនទាក់ទងនឹងទេសចរណ៍ នៅជប៉ុន បានធ្លាក់ចុះ ចាប់តាំងពីការព្រមានត្រូវបានចេញផ្សាយកាលពីថ្ងៃទី១៤ ខែវិច្ឆិកា៕