នាយកសាលា បានប្រាប់សារព័ត៌មាន AP កាលពីថ្ងៃអង្គារថា ក្មេងស្រីសិស្សសាលាម្នាក់ ដែលត្រូវបានចាប់ពង្រត់ជាមួយមនុស្ស ២៤ នាក់ផ្សេងទៀតពីអន្តេវាសិកដ្ឋានមួយនៅភាគពាយ័ព្យនៃប្រទេសនីហ្សេរីយ៉ា បានរត់គេចខ្លួន ហើយមានសុវត្ថិភាព ខណៈដែលក្រុមអ្នកស្វែងរក បានចូលរួមជាមួយកងកម្លាំងសន្តិសុខ ដើម្បីស្វែងរកសិស្សដែលបានបាត់ខ្លួននៅក្នុងព្រៃក្បែរសាលារៀននោះ។

ក្មេងស្រីទាំងនោះ ត្រូវបានចាប់ពង្រត់ នៅព្រឹកព្រលឹមថ្ងៃចន្ទ នៅពេលដែលខ្មាន់កាំភ្លើង បានវាយប្រហារអន្តេវាសិកដ្ឋាននៅសាលាមធ្យមសិក្សាសម្រាប់ក្មេងស្រី នៅក្នុងទីក្រុង Maga រដ្ឋ Kebbi។ នគរបាលតំបន់បាននិយាយថា ក្រុមខ្មាន់កាំភ្លើង បានឡើងរបង ដើម្បីចូលទៅក្នុងបរិវេណសាលា ហើយបានបាញ់ប្រហារតគ្នាជាមួយមន្ត្រីនគរបាល មុនពេលចាប់ខ្លួនក្មេងស្រីទាំងនោះ និងសម្លាប់បុគ្គលិកម្នាក់។

ពុំមានក្រុមណាមួយ អះអាងទទួលខុសត្រូវចំពោះការចាប់ក្មេងស្រីទាំងនោះទេ ប៉ុន្តែអ្នកវិភាគ និងអ្នកស្រុក និយាយថា ក្រុមចោរប្លន់តែងតែកំណត់គោលដៅលើសាលារៀន អ្នកធ្វើដំណើរ និងអ្នកភូមិដាច់ស្រយាល ក្នុងការចាប់ពង្រត់ ដើម្បីយកប្រាក់លោះ។ អាជ្ញាធរនិយាយថា ចោរប្លន់ភាគច្រើនជាអតីតអ្នកឃ្វាលសត្វ ដែលបានកាន់អាវុធប្រឆាំងនឹងសហគមន៍កសិកម្ម បន្ទាប់ពីការប៉ះទង្គិចគ្នារវាងពួកគេ ទៅលើធនធានដែលត្រូវបានប្រើប្រាស់ដ៏ច្រើនលើសលប់។

ការចាប់ជំរិតសិស្សក្នុងសាលារៀនជាក្រុម គឺជារឿងធម្មតាជាពិសេស នៅភាគខាងជើងប្រទេសនីហ្សេរីយ៉ា ហើយសាលារៀន Kebbi គឺស្ថិតនៅជិតចំណុចក្តៅនៃជម្លោះ រួមទាំងរដ្ឋ Zamfara និង Sokoto ជាកន្លែងដែលជនអន្ធពាលជាច្រើនក្រុម ត្រូវបានគេដឹងថា ធ្វើប្រតិបត្តិការ និងលាក់ខ្លួន៕