ប្រទេសមហាអំណាចទាំង ៣ របស់អឺរ៉ុប និងសហរដ្ឋអាមេរិក បានដាក់ជូននូវសេចក្តីព្រាងសេចក្តីសម្រេចមួយទៅកាន់កិច្ចប្រជុំសប្តាហ៍នេះនៃក្រុមប្រឹក្សាភិបាលចំនួន ៣៥ប្រទេសនៃអង្គការឃ្លាំមើលបរមាណូ របស់អង្គការសហប្រជាជាតិ (UN) ដែលទាមទារឲ្យមានចម្លើយ និងការផ្ដល់លទ្ធភាពពីអ៊ីរ៉ង់ ពាក់ព័ន្ធនឹងទីតាំងនុយក្លេអ៊ែរដែលរងការទម្លាក់គ្រាប់បែក និងការស្តុកសារធាតុអ៊ុយរ៉ានីញ៉ូមដែលចម្រាញ់ហើយ។

ក្រុមអ្នកការទូតបានឲ្យដឹងថា សេចក្តីព្រាងសេចក្ដីសម្រេចដែលដាក់ជូនដោយប្រទេសបារាំង អង់គ្លេស អាល្លឺម៉ង់ និងសហរដ្ឋអាមេរិក កាលពីថ្ងៃអង្គារ (ទី១៨ ខែវិច្ឆិកា) និងដែលត្រូវបានឃើញដោយសារព័ត៌មាន Reuters ទំនងជានឹងត្រូវអនុម័តនៅព្រឹកថ្ងៃពុធនេះ។ សេចក្ដីព្រាងនេះធ្វើឡើងបន្ទាប់ពីមានរបាយការណ៍ថ្កោលទោសរបស់ទីភ្នាក់ងារថាមពលអាតូមិកអន្តរជាតិ (IAEA) ស្តីពីអ៊ីរ៉ង់ ដែលបានផ្ញើទៅរដ្ឋសមាជិកកាលពីសប្តាហ៍មុន។

របាយការណ៍នោះបានលើកឡើងថា ទីក្រុងតេអេរ៉ង់នៅតែមិនព្រមឲ្យក្រុមអធិការកិច្ចចូលទៅកាន់ទីតាំងនុយក្លេអ៊ែរដែលត្រូវបានអ៊ីស្រាអែល និងសហរដ្ឋអាមេរិកទម្លាក់គ្រាប់បែក កាលពីខែមិថុនា ហើយថា ការផ្ដល់របាយការណ៍ ជុំវិញការស្តុកសារធាតុអ៊ុយរ៉ានីញ៉ូម គឺ «យឺតណាស់» ។

សេចក្តីព្រាងនេះបានរៀបរាប់ថា៖ «អ៊ីរ៉ង់ត្រូវតែផ្តល់ឲ្យទីភ្នាក់ងារ (ថាមពលអាតូមិកអន្តរជាតិ) ដោយមិនបង្អង់ពេលយូរ ជាមួយនឹងព័ត៌មានច្បាស់លាស់ ស្តីពីរបាយការណ៍វត្ថុធាតុនុយក្លេអ៊ែរ និងទីកន្លែងនុយក្លេអ៊ែរដែលត្រូវបានការពារយ៉ាងតឹងរ៉ឹង នៅអ៊ីរ៉ង់ ហើយផ្តល់លទ្ធភាពគ្រប់យ៉ាងឲ្យទីភ្នាក់ងារ ដែលទាមទារផ្ទៀងផ្ទាត់ព័ត៌មាននេះ»៕