ប្រធានាធិបតីអ៊ុយក្រែន លោក Volodymyr Zelenskyy នៅថ្ងៃពុធ (ទី១៩ ខែវិច្ឆិកា) នេះ បានលម្អិតពីការទទួលបានទឹកប្រាក់ជាង ១,១ពាន់លានអឺរ៉ូ (១,២៧ពាន់លានដុល្លារ) ដែលជាការប្តេជ្ញាចិត្តផ្ដល់ជំនួយការពារជាតិ និងថាមពលថ្មី បន្ទាប់ពីបានធ្វើដំណើរទស្សនកិច្ចទៅកាន់ប្រទេសក្រិក បារាំង និងអេស្ប៉ាញ ដោយបានបញ្ជាក់ថា កិច្ចព្រមព្រៀងនេះ នឹងពង្រឹងការការពារដែនអាកាស អាកាសចរណ៍ និងសន្តិសុខថាមពលរដូវរងារបស់អ៊ុយក្រែន។

លោក Zelenskyy បានឲ្យដឹងនៅលើកម្មវិធីផ្ញើសារ Telegram ថា ការសន្យារបស់ក្រិក នឹងផ្គត់ផ្គង់បរិមាណឧស្ម័ន សម្រាប់រដូវត្រូវការកម្ដៅ ជាផ្នែកនៃកិច្ចព្រមព្រៀងដែលត្រូវបានចុះហត្ថលេខានៅទីក្រុងអាតែន ដោយបានចាត់ទុកប្រទេសនេះថា ជា «មជ្ឈមណ្ឌលថាមពលដ៏សំខាន់ សម្រាប់អ៊ុយក្រែន និងសម្រាប់បណ្ដាប្រទេសអឺរ៉ុបកណ្តាល និងខាងកើតទាំងអស់»។

ជាមួយគ្នានេះ លោកបានប្រកាសថា បារាំងបានយល់ព្រមពង្រីកកិច្ចសហប្រតិបត្តិការការពារជាតិយ៉ាងខ្លាំងក្លា ក្នុងនោះរួមមានទាំងផែនការ ដើម្បីឲ្យអ៊ុយក្រែនទិញយន្តហោះ Rafale F4 ចំនួន ១០០គ្រឿង នៅឆ្នាំ២០៣៥ ក៏ដូចជាប្រព័ន្ធការពារដែនអាកាស SAMP/T រ៉ាដាកម្រិតខ្ពស់ មីស៊ីលបាញ់ពីអាកាសទៅអាកាស និងគ្រាប់បែកនាំផ្លូវពីលើអាកាស។ ហើយទីក្រុងប៉ារីសក៏នឹងផ្តល់កញ្ចប់ជំនួយយោធាថ្មីនៅចុងឆ្នាំនេះផងដែរ។

មេដឹកនាំអ៊ុយក្រែនបានបន្ថែមថា អេស្ប៉ាញបានសន្យាផ្តល់ប្រាក់ចំនួន ១០០លានអឺរ៉ូ (១១៥លានដុល្លារ) ដល់គំនិតផ្តួចផ្តើម PURL (គំនិតផ្តួចផ្តើមបញ្ជីតម្រូវការអ៊ុយក្រែនជាអាទិភាព) ដើម្បីទិញមីស៊ីលការពារដែនអាកាស ២១៥លានអឺរ៉ូ (២៤៨,៧លានដុល្លារ) ក្រោមវិធានាការឧបករណ៍សុវត្ថិភាព និង ២០០លានអឺរ៉ូ (២១៣,៤លានដុល្លារ) ដើម្បីគាំទ្រដល់វិស័យថាមពលរបស់អ៊ុយក្រែន។

គួរបញ្ជាក់ថា គំនិតផ្តួចផ្តើមបញ្ជីតម្រូវការអ៊ុយក្រែនជាអាទិភាព (PURL) គឺជាកម្មវិធីរបស់សហរដ្ឋអាមេរិក និងអង្គការណាតូ (NATO) ដែលអនុញ្ញាតឲ្យប្រទេសជាសមាជិកណាតូនៅអឺរ៉ុប និងកាណាដា ផ្តល់មូលនិធិ ដើម្បីទិញអាវុធផលិតដោយអាមេរិកផ្គត់ផ្គង់ឲ្យអ៊ុយក្រែន៕