ក្រុមមន្ត្រីក្នុងតំបន់ហ្កាហ្សាបាននិយាយថា ការវាយប្រហារតាមអាកាសរបស់អ៊ីស្រាអែលលើតំបន់ហ្កាហ្សាបានសម្លាប់មនុស្ស ២៧ នាក់កាលពីថ្ងៃពុធ១៩វិច្ឆិកាសប្ដាហ៍នេះ ដោយភាគីអ៊ីស្រាអែល និងហាម៉ាស ចោទដាក់គ្នា ថាបានរំលោភលើបទឈប់បាញ់ដ៏ផុយស្រួយនៅក្នុងទឹកដីប៉ាឡេស្ទីនមួយនេះ ។

ការវាយប្រហារទាំងនេះស្ថិតក្នុងការវាយប្រហារដ៏សាហាវបំផុតជាច្រើនក្នុងតំបន់ហ្កាហ្សាចាប់តាំងពីបទឈប់បាញ់ចូលជាធរមានកាលពីខែមុន ហើយបានកើតឡើង ខណៈអ៊ីស្រាអែលក៏បានប្រកាសពីការវាយប្រហារជាបន្តបន្ទាប់ផ្តោតលើក្រុមហេសបូឡានៅលីបង់ផងដែរ ទោះមានបទឈប់បាញ់ជិតមួយឆ្នាំនៅទីនោះក៏ដោយ។  

យោងតាមទីភ្នាក់ងារការពារជនស៊ីវិលរបស់តំបន់នេះ ដែលដំណើរការក្រោមអាជ្ញាធរហាម៉ាស បានឲ្យដឹងថា មនុស្ស ១៤ នាក់ត្រូវបានសម្លាប់កាលពីថ្ងៃពុធសប្ដាហ៍នេះ នៅទីក្រុងហ្កាហ្សាភាគខាងជើង និង ១៣ នាក់នៅក្នុងតំបន់ Khan Yunis នៅភាគខាងត្បូង។

យោធាអ៊ីស្រាអែលបាននិយាយថា ខ្លួនកំពុងវាយប្រហារក្រុមហាម៉ាស បន្ទាប់ពីក្រុមសកម្មប្រយុទ្ធបានបើកការបាញ់ប្រហារទៅកាន់តំបន់មួយដែលកងទ័ពកំពុងធ្វើប្រតិបត្តិការនៅភាគខាងត្បូងក្នុង ការរំលោភលើកិច្ចព្រមព្រៀងបទឈប់បាញ់។  

ក្រុមហាម៉ាសបានបដិសេធការចោទប្រកាន់នេះ ហើយបានស្ដីបន្ទោសការវាយប្រហារទាំងនេះថាជា ការកើនឡើងដ៏គ្រោះថ្នាក់ ដែលអាចធ្វើឱ្យប៉ះពាល់ដល់បទឈប់បាញ់ ភាគច្រើនបានបន្តចាប់តាំងពីថ្ងៃទី ១០ ខែតុលា ២០២៥ ទោះមានការផ្ទុះអាវុធក៏ដោយ៕