បន្ទាប់ពីប្រព័ន្ធផ្សព្វផ្សាយជាច្រើនរាយការណ៍ថា សហរដ្ឋអាមេរិក បានព្រាងផែនការសន្តិភាព ២៨ចំណុចមួយដោយស្ងាត់ៗ ដែលស្នើឱ្យអ៊ុយក្រែនបោះបង់ទឹកដីមួយចំនួន អ្នកនាំពាក្យវិមានក្រឹមឡាំង លោក Dmitry Peskov បានចេញឆ្លើយតបកាលពីថ្ងៃពុធ (១៩ វិច្ឆិកា) ថា ពុំមានការវិវត្តអ្វីថ្មីត្រូវប្រកាសឡើយ ចាប់តាំងពីកិច្ចប្រជុំកំពូលខែសីហា រវាងលោកប្រធានាធិបតីរុស្ស៊ី Vladimir Putin និងសមភាគីអាមេរិក លោក Donald Trump មក ទាក់ទងនឹងលទ្ធភាពនៃផែនការសន្តិភាពដើម្បីបញ្ចប់សង្រ្គាមនៅអ៊ុយក្រែននោះ។

លោក Peskov និយាយទៀតថា ការប្រាស្រ័យទាក់ទងជាមួយភាគីអាមេរិក បានបន្តពិតមែន ប៉ុន្តែការងារធំដុំណាមួយសម្រាប់កិច្ចប្រជុំកំពូលមួយផ្សេងទៀត នៅមិនទាន់ធ្វើឡើងនៅឡើយទេ។ អ្នកនាំពាក្យរូបនេះបន្ថែមថា ពុំមានកិច្ចពិភាក្សាណាមួយបានធ្វើឡើងជាមួយប្រេសិតអាមេរិក លោក Steve Witkoff នោះទេ ប៉ុន្តែវត្តមានរបស់លោកទៅកាន់ទីក្រុងមូស្គូ ត្រូវបានស្វាគមន៍ជានិច្ច។

ដោយឡែកនៅខាងអ៊ុយក្រែនវិញ មន្ត្រីជាន់ខ្ពស់ទីក្រុងគីវមួយរូបបានប្រាប់សារព័ត៌មានរ៉យទ័រ អ៊ុយក្រែនបានទទួល "សញ្ញា" មួយចំនួនអំពីសំណើរបស់សហរដ្ឋអាមេរិក ដើម្បីបញ្ចប់សង្គ្រាម ប៉ុន្តែក៏និយាយថា អ៊ុយក្រែន មិនបានពាក់ព័ន្ធនឹងសំណើនេះទេ។

កិច្ចខិតខំប្រឹងប្រែងដើម្បីស្ដារកិច្ចចរចារឡើងវិញរវាងអ៊ុយក្រែន និងរុស្ស៊ី ហាក់ដូចជាកំពុងមានសន្ទុះ បើទោះជាទីក្រុងមូស្គូ មិនបង្ហាញសញ្ញាផ្លាស់ប្តូរចេញពីលក្ខខណ្ឌរបស់ខ្លួនសម្រាប់ការបញ្ចប់សង្គ្រាមក៏ដោយ ខណៈជម្លោះកំពុងខិតជិតដល់រយៈពេល ៤ឆ្នាំទៅហើយ៕