កំពត៖ ប្រជាពលរដ្ឋនៅឃុំកំពង់គ្រែង ស្រុកទឹកឈូ ខេត្តកំពត បានលើកឡើងថា ឃុំកំពង់គ្រែងនាពេ លបច្ចុប្បន្នបានរីកចម្រើនស្ទើរគ្រប់វិស័យ ក្នុងនោះវិស័យទេសចរណ៍លេចធ្លោជាងគេ។ ប្រជាពលរដ្ឋជាច្រើនគ្រួសារកំពុងកែប្រែជីវភាពរស់នៅរបស់ខ្លួនកាន់តែប្រសើរ ដោយសារការច្នៃបង្កើតមុខរបរផ្ទា ល់ខ្លួន ដើម្បីបម្រើដល់វិស័យទេសចរណ៍នេះ។ ​

កំពង់គ្រែងជាឃុំមួយរបស់ស្រុកទឹកឈូ ខេត្តកំពត។ ឃុំនេះជាប់នឹងក្រុងកំពតភាគខាងជើង សណ្តូកតាមដងព្រែកកំពត ផ្នែកខាងកើត រហូតដល់ព្រែកកំចាយ។ ដោយសារទីតាំងភូមិសាស្ត្រមានសកត្តានុពល មានទេសភាពព្រែក ទេសភាពភ្នំ និងកោះច្រើនគ្របដណ្តប់ដោយព្រៃចាកនឹងហ៊ុមព័ទ្ធដោយទឹកថ្លាដូចកញ្ចក់នោះ ធ្វើឲ្យទេសចរជាតិ និងអន្តរជាតិកាន់តែច្រើនទៅទស្សនាគ្រប់រដូវកាល។    

ម្ចាស់រមណីយដ្ឋាន “បុប្ផាព្រៃ” ស្ថិតនៅភូមិកំពង់ក្រុង ឃុំកំពង់គ្រែង ស្រុកទឹកឈូ បានឲ្យដឹងថា នៅឆ្នាំ ២០១៤ លោកស្រីបានបង្កើតជាកន្លែងសម្រាប់លក់ម្ហូបអាហារឲ្យភ្ញៀវទេសចរមកអង្គុយកម្សាន្តនៅតា មដងព្រែក។ លុះក្រោយមក ដោយមើលឃើញកំណើនភ្ញៀវ ទើបរយៈពេលប៉ុន្មានឆ្នាំចុងក្រោយនេះ គាត់បានបង្កើតជាផ្ទះសំណាក់ បឹងហ្គាឡូ អាហារដ្ឋាន បន្ថែមសេវាកម្មជិះទូកកាយ៉ាក់ ទូកម៉ាស៊ីនដឹកភ្ញៀវកម្សាន្តតាមដងព្រែកជាដើម និងមានខ្ចុះលើទឹកសម្រាប់អង្គុយលម្ហែ និងរៀបចំកម្មវិធីជប់លៀង ឬ ប៊ីប៊ីឃ្យូជាលក្ខណៈក្រុមគ្រួសារផងដែរ។ លោកស្រីបញ្ជាក់ថា វិស័យទេសចរណ៍ឃុំកំពង់គ្រែងកំពុងរីកចម្រើនខ្លាំង កន្លែងសម្រាកកម្សាន្តបង្កើតថ្មីៗច្រើន ហើយប្រជាពលរដ្ឋពូកែធ្វើចំណីអាហារឆ្ងាញ់ៗ តម្លៃសមរម្យ ពិសេសទេសភាពធម្មជាតិនៅតាមដងព្រែកស្អាតធ្វើឲ្យភ្ញៀវមិនអាចបំភ្លេចបាន។

ចំណែកបុគ្គលិករបស់វីឡា វីឌីស៊ី ស្ថិតនៅឃុំកំពង់គ្រែងដែរនោះ បានឲ្យដឹងថា ដំបូងឡើយកន្លែងខ្លួន ផ្តល់តែសេវាកម្មស្នាក់នៅប៉ុន្មានបន្ទប់ប៉ុណ្ណោះ ប៉ុន្តែដោយសារកំណើនភ្ញៀវ និងដើម្បីប្រណាំងប្រជែងដណ្តើមទីផ្សារជាមួយកន្លែងផ្សេងៗជាច្រើនទៀតនោះ  វីឌីស៊ី បានពង្រីកនិងសាងសង់វីឡា បឹងហ្គាឡូថ្មី អាងទឹកថ្មី បន្ទប់ប្រជុំ អាហារដ្ឋាន និងសេវាកម្មជិះទូកកម្សាន្ត។ បុគ្គលិករូបនេះបន្ថែមថា ទោះស្ថិតនៅក្នុងបរិបទកូវីដ-១៩ ភ្ញៀវនៅតែមកជាហូរហែធម្មតា ហើយបើថ្ងៃចុងសប្តាហ៍ភ្ញៀវមកកាន់តែច្រើន។ គាត់ក៏បានថ្លែងអំណរគុណដល់ថ្នាក់ដឹកនាំដែលបានផ្តល់ឱកាសការងារសម្រាប់ប្រជាពរដ្ឋនៅក្នុងមូលដ្ឋាន ព្រោះបើមិនមានការជ្រោមជ្រែងពីថ្នាក់ដឹកនាំទេ អ្នកវិនិយោគក៏មិនហ៊ានចូលមកបង្កើតកន្លែងរកស៊ីនៅឃុំកំពង់គ្រែងនេះដែរ។ 

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានឱ្យដឹងដែរថា ឃុំកំពង់គ្រែងពិតជាមានសន្ទុះនៃការអភិវឌ្ឍខ្លាំងនៅលើវិស័យទេសចរណ៍ ជារួមទាំងកន្លែងស្នាក់នៅ និងកន្លែងកម្សាន្តផ្សេងៗសុទ្ធសឹងមានលក្ខណៈជាតំបន់អេកូទេសចរណ៍ធម្មជាតិ ហើយភ្ញៀវភាគច្រើនទៅសម្រាក និងកម្សាន្តនៅទីនោះ៕ ដោយ៖ អន សារីម