ភ្លាមៗបន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចមួយស្តីពីការបង្កើតកងកម្លាំងពហុជាតិ (ISF) ដែលត្រូវដាក់ពង្រាយទៅកាន់តំបន់ហ្កាហ្សា រដ្ឋបាលសហរដ្ឋអាមេរិកបានចាប់ផ្តើមពន្លឿនដំណើរបង្កើតរបស់ខ្លួន។  

មន្ត្រីអាមេរិកមួយរូបបានប្រាប់សារព័ត៌មាន The Jerusalem Post ថា ទាហានពហុជាតិ ISF ជំនាន់ដំបូង ត្រូវគេរំពឹងថានឹងទៅដល់តំបន់ហ្កាហ្សានៅដើមឆ្នាំ ២០២៦ខាងមុខ។   

មន្ត្រីរូបនេះបានបន្ថែមថា នៅដំណាក់កាលនេះ ប្រទេសមួយចំនួនតូចបានបង្ហាញចំណាប់អារម្មណ៍ក្នុងការចូលរួមចំណែកផ្ដល់កងទ័ពដល់កងកម្លាំងនេះ។     

លោកពុំបានបញ្ជាក់ថាប្រទេសទាំងនេះជាប្រទេសណាខ្លះនោះទេ ប៉ុន្តែមន្ត្រីមួយរូបទៀតដែលបាននិយាយជាមួយសារព័ត៌មាន The Jerusalem Post បាននិយាយថា អាស៊ែបៃហ្សង់ និងឥណ្ឌូនេស៊ីបច្ចុប្បន្នជាប្រទេសពីរដែលទំនងជាបញ្ជូនទាហានឲ្យចូលរួម។

នៅពេលនេះ ការបណ្តុះបណ្តាលសម្រាប់ការដាក់ពង្រាយកងកម្លាំងទៅកាន់តំបន់ហ្កាហ្សាមិនទាន់បានចាប់ផ្តើមនៅឡើយទេ ហើយកិច្ចខិតខំប្រឹងប្រែងនៅតែដំណើរការដើម្បីធានាបាននូវមូលនិធិយ៉ាងទូលំទូលាយដែលត្រូវការសម្រាប់ប្រតិបត្តិការ ISFក្នុងដែនដីហ្កាហ្សា។ 

នាយករដ្ឋមន្ត្រីអ៊ីស្រាអែលលោក Benjamin Netanyahu កំពុងអំពាវនាវដល់ប្រទេសជិតខាងឱ្យចូលរួមក្នុងការតស៊ូរបស់រដ្ឋជ្វីហ្វ ដើម្បីបណ្តេញក្រុមហាម៉ាសចេញពីតំបន់នេះ ។

ការិយាល័យរបស់លោក Netanyahu បានសរសេរនៅលើបណ្ដាញសង្គម X ថា អ៊ីស្រាអែលបានបើកដៃទទួលសន្តិភាព និងវិបុលភាពដល់ប្រទេសជិតខាងរបស់ខ្លួនទាំងអស់ ហើយអំពាវនាវដល់ប្រទេសទាំងនោះធ្វើឱ្យទំនាក់ទំនងជាមួយអ៊ីស្រាអែលមានប្រក្រតីភាពឡើងវិញ និងចូលរួមជាមួយខ្លួន ក្នុងការបណ្តេញក្រុមហាម៉ាស និងអ្នកគាំទ្ររបស់ក្រុមនេះចេញពីតំបន់ហ្កាហ្សា៕