ប្រទេសស៊ីរី បានថ្កោលទោសដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល លោក Benjamin Netanyahu និងមន្ត្រីជាន់ខ្ពស់ផ្សេងទៀត ទៅកាន់ភាគខាងត្បូងប្រទេស ជាកន្លែងដែលលោក និងក្រុមមន្ត្រីបានចុះពិនិត្យកងទ័ពដាក់ពង្រាយនៅទឹកដីប្រទេសស៊ីរីដែលពួកគេបានចូលកាន់កាប់រយៈពេលជាច្រើនខែមកហើយ។

អ៊ីស្រាអែល បានពង្រីកការចូលកាន់កាប់របស់ខ្លួននៅភាគខាងត្បូងប្រទេសស៊ីរី ខណៈរបបរបស់អតីតប្រធានាធិបតី លោក Bashar al-Assad ត្រូវបានលុកលុយដោយកងកម្លាំងឧទ្ទាម កាលពីខែធ្នូ។ លោក Ibrahim Olabi ឯកអគ្គរដ្ឋទូតស៊ីរីប្រចាំអង្គការសហប្រជាជាតិ បាននិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធថា «រដ្ឋាភិបាលរបស់ខ្ញុំថ្កោលទោសយ៉ាងខ្លាំងចំពោះដំណើរទស្សនកិច្ចបង្កហេតុនេះ ជាគំរូនៃការឈ្លានពានជាបន្តបន្ទាប់របស់អ៊ីស្រាអែលប្រឆាំងនឹងស៊ីរី និងប្រជាជនរបស់ប្រទេស»។ «យើងបន្តការអំពាវនាវរបស់យើងដល់អង្គការសហប្រជាជាតិ និងក្រុមប្រឹក្សានេះ ឱ្យចាត់វិធានការយ៉ាងម៉ឺងម៉ាត់និងជាបន្ទាន់ ដើម្បីបញ្ឈប់ការរំលោភបំពានទាំងនេះ ធានាបានការមិនកើតឡើងជាថ្មី បញ្ចប់ការចូលកាន់កាប់ និងអនុវត្តសេចក្តីសម្រេចដែលពាក់ព័ន្ធ ជាពិសេសកិច្ចព្រមព្រៀងដកកងទ័ពឆ្នាំ១៩៧៤» ដែលបានធ្វើឡើងបន្ទាប់ពីសង្គ្រាមអារ៉ាប់-អ៊ីស្រាអែល ឆ្នាំ១៩៧៣។

អ្នកនាំពាក្យអង្គការសហប្រជាជាតិ លោក Stephane Dujarric បានពិពណ៌នាចំណាត់ការនៃ «ដំណើរទស្សនកិច្ចជាសាធារណៈ» របស់លោក Netanyahu និងមន្ត្រីជាន់ខ្ពស់អ៊ីស្រាអែលផ្សេងទៀតថាជាការ «គួរឱ្យព្រួយបារម្ភ»។

លោក Dujarric បាននិយាយថា សេចក្តីសម្រេចរបស់អង្គការសហប្រជាជាតិ ដែលអនុម័តកាលពីពេលថ្មីៗនេះដោយក្រុមប្រឹក្សាសន្តិសុខ «បានអំពាវនាវឱ្យមានអធិបតេយ្យភាពពេញលេញ ឯកភាព ឯករាជ្យភាព និងបូរណភាពទឹកដីរបស់ប្រទេសស៊ីរី»។