ចក្រភពអង់គ្លេស បាននិយាយថា ខ្លួនមានគោលដៅដូចទៅនឹងលោកប្រធានាធិបតីអាមេរិក Donald Trump ក្នុងការបញ្ចប់សង្រ្គាមនៅអ៊ុយក្រែន និងជំរុញឱ្យរុស្ស៊ី ដកកងកម្លាំងជាបន្ទាន់ បន្ទាប់ពីសារព័ត៌មានរ៉យទ័រ រាយការណ៍ថា ទីក្រុងវ៉ាស៊ីនតោន ជំរុញទីក្រុងគីវ ឱ្យទទួលយកក្របខណ្ឌសន្តិភាពមួយ ដែលព្រាងដោយអាមេរិក។ សេចក្តីព្រាងនេះ ស្នើឱ្យអ៊ុយក្រែន បោះបង់ទឹកដី និងសព្វាវុធមួយចំនួន។

អ្នកនាំពាក្យការិយាល័យការបរទេសរបស់ចក្រភពអង់គ្លេស បាននិយាយថា៖ «រុស្ស៊ីអាចធ្វើកិច្ចការនេះបាន ដោយការដកកងកម្លាំងចេញ និងបញ្ចប់ប្រតិបត្តិការយោធារបស់ខ្លួន» ដោយបន្តថា «ទីក្រុងឡុងដ្រ៍ មានបំណងប្រាថ្នាដូចលោកប្រធានាធិបតី Trump ដែរ នោះគឺជាការនាំយកសង្រ្គាមដ៏ព្រៃផ្សៃនេះឱ្យដល់ទីបញ្ចប់»។

កាលពីថ្ងៃពុធ (១៩ វិច្ឆិកា) ទីភ្នាក់ងារសារព័ត៌មានរ៉យទ័រ បានរាយការណ៍បន្តពីសារព័ត៌មាន Axios ដោយសម្អាងដល់ក្រុមមន្រ្តីអាមេរិក និងរុស្ស៊ីថា រដ្ឋបាលទីក្រុងវ៉ាស៊ីនតោន កំពុងបង្កើតផែនការថ្មីមួយដោយស្ងាត់ៗដើម្បីបញ្ចប់សង្រ្គាមនៅអ៊ុយក្រែន ក្នុងការពិគ្រោះយោបល់ពិភាក្សាជាមួយរុស្ស៊ី។ បណ្តាញព័ត៌មាននេះរាយការណ៍ថា សំណើថ្មីនេះគឺជាផែនទីបង្ហាញផ្លូវ ២៨ចំណុច ដែលត្រូវបំផុសគំនិតដោយផែនការសន្តិភាពមជ្ឈិមបូព៌ារបស់លោក Trump សម្រាប់បទឈប់បាញ់ហ្កាហ្សា។

ប្រភពដែលដឹងរឿងនេះបានប្រាប់រ៉យទ័រថា អាមេរិក បានផ្តល់សញ្ញាប្រាប់លោកប្រធានាធិបតីអ៊ុយក្រែន Volodymyr Zelenskyy ថា ទីក្រុងគីវត្រូវតែទទួលយកក្របខណ្ឌដែលតាក់តែងឡើងដោយអាមេរិកមួយនេះ ដើម្បីបញ្ចប់សង្រ្គាមជាមួយរុស្ស៊ី ដែលស្នើឱ្យទីក្រុងគីវ បោះបង់ទឹកដី និងអាវុធមួយចំនួន៕