មនុស្សយ៉ាងហោចណាស់ពីរនាក់បានស្លាប់ និង៨នាក់ត្រូវបានចាប់ខ្លួនកាលពីថ្ងៃពុធ ទី១៩ ខែវិច្ឆិកា ក្នុងអំឡុងប្រតិបត្តិការរបស់នគរបាលនៅក្នុងសង្កាត់Vila Kennedy នៃទីក្រុង Rio de Janeiro នេះបើយោងតាមសេចក្តីថ្លែងការណ៍របស់នគរបាលស៊ីវិលរបស់រដ្ឋ។

ប្រតិបត្តិការនេះ ធ្វើឡើងបន្ទាប់ពីការឆ្មក់បង្ក្រាបរបស់នគរបាលដ៏ខ្លាំងក្លាបំផុតក្នុងប្រវត្តិសាស្ត្ររបស់ប្រទេសប្រេស៊ីលកាលពីខែមុន ដែលបានសម្លាប់មនុស្ស១២១នាក់ រួមទាំងមន្ត្រីនគរបាលចំនួន៤នាក់។

យោងតាមអាជ្ញាធរតំបន់បានឲ្យដឹងថា ប្រតិបត្តិការទាំងពីរលើកបានកំណត់គោលដៅទៅលើក្រុមជនអន្ធពាល Comando Vermelho ដែលគ្រប់គ្រងការជួញដូរគ្រឿងញៀននៅក្នុងសង្កាត់ក្រីក្រ និងមានមនុស្សរស់នៅច្រើន។

នគរបាលស៊ីវិលបាននិយាយនៅក្នុងសេចក្តីថ្លែងការណ៍ថា «នេះគឺជាដំណាក់កាលមួយទៀតនៃប្រតិបត្តិការបង្ក្រាប» ដែលបញ្ជាក់ពីការប្រយុទ្ធប្រឆាំងក្រុម Comando Vermelho នៅក្នុងសកម្មភាពឧក្រិដ្ឋកម្មផ្សេងៗរបស់ខ្លួន» ខណៈ «គ្រឿងញៀនមួយចំនួនធំ» ត្រូវបានរកឃើញ។

ឧក្រិដ្ឋជនចំនួនបួននាក់ បានរងរបួសក្នុងអំឡុងពេលប្រឈមមុខដាក់គ្នាជាមួយនគរបាលក្នុងការឆ្មក់បង្ក្រាបកាលពីថ្ងៃពុធ នេះបើយោងតាមសេចក្តីថ្លែងការណ៍ដាច់ដោយឡែកមួយរបស់យោធា។