លោកនាយករដ្ឋមន្ត្រី Robert Fico បានថ្លែងកាលពីថ្ងៃពុធថា ប្រទេសស្លូវ៉ាគី កំពុងពិចារណាប្តឹងសហភាពអឺរ៉ុប (EU) ជុំវិញផែនការរបស់ខ្លួន ក្នុងការបញ្ឈប់ការផ្គត់ផ្គង់ឧស្ម័នរបស់រុស្ស៊ី ចាប់ពីឆ្នាំ ២០២៨ ដោយសារសង្គ្រាមរបស់ប្រទេសនេះ នៅអ៊ុយក្រែន។

ស្លូវ៉ាគី និងហុងគ្រី បានរិះគន់យ៉ាងចាស់ដៃចំពោះផែនការរបស់នាយកប្រតិបត្តិ EU ក្នុងការបញ្ឈប់ថាមពលរបស់រុស្ស៊ីជាបណ្តើរៗ ដោយប្រទេសទាំងពីរ នៅតែពឹងផ្អែកយ៉ាងសំខាន់ទៅលើការផ្គត់ផ្គង់ឧស្ម័ន និងប្រេងពីទីក្រុងមូស្គូ ហើយមានការភ័យខ្លាចថា ជម្រើសដែលមានតម្លៃថ្លៃជាង នឹងធ្វើឲ្យប៉ះពាល់ដល់សេដ្ឋកិច្ចរបស់ពួកគេ។

លោក Fico ដែលមិនបានធ្វើតាមការណែនាំរបស់ប្រទេសភាគច្រើននៅអឺរ៉ុប ជុំវិញជំហរគាំទ្រទីក្រុងមូស្គូរបស់ខ្លួន បាននិយាយកាលពីថ្ងៃពុធថា លោកបានប្រគល់ភារកិច្ចឲ្យរដ្ឋមន្ត្រីក្រសួងសេដ្ឋកិច្ច ក្រសួងការបរទេស និងយុត្តិធម៌របស់ខ្លួន វិភាគជម្រើសដើម្បីប្តឹង EU ជុំវិញការបញ្ឈប់ការផ្គត់ផ្គង់ឧស្ម័នរបស់រុស្ស៊ី ដល់ប្រទេសស្លូវ៉ាគី។

លោក Fico បានប្រាប់សន្និសីទសារព័ត៌មានតាមទូរទស្សន៍ថា៖«នឹងមានឯកសារមួយ ដែលត្រូវបានពិភាក្សាដោយរដ្ឋាភិបាលនៅសប្តាហ៍ក្រោយ ដែលយើងនឹងពិចារណាពីលទ្ធភាពនៃការដាក់ពាក្យបណ្តឹង»សហភាពអឺរ៉ុបផែនការបញ្ឈប់ការផ្គត់ផ្គង់ឧស្ម័នរបស់រុស្ស៊ី»។ 

លោក Fico បានបន្ថែមថា ពុំអាចរារាំងផែនការនានាបានទេ ពោលគឺ«អ្វីៗនឹងអាស្រ័យច្រើនលើរបៀបដែលគណៈកម្មការអឺរ៉ុបអនុវត្តកាតព្វកិច្ចរបស់ខ្លួនចំពោះប្រទេសស្លូវ៉ាគី ដែលត្រូវបានព្រមព្រៀង និងចុះហត្ថលេខាផ្ទាល់ដោយប្រធានគណៈកម្មការអឺរ៉ុប» ដោយយោងទៅលើការធានាលើកង្វះខាត ឬការដំឡើងតម្លៃឧស្ម័នដែលអាចកើតមាន ដែលនាយកប្រតិបត្តិសហភាពអឺរ៉ុបបានផ្តល់ឲ្យកាលពីដើមឆ្នាំនេះ៕