កាសែត Financial Times (FT) បានសរសេរដោយដកស្រង់ប្រភពថា ផែនការដោះស្រាយជម្លោះអ៊ុយក្រែនរបស់រដ្ឋបាលប្រធានាធិបតីអាមេរិក ដូណាល់ ត្រាំ បានចែងថា មិនគួរមានកងទ័ពបរទេសណាមួយ ត្រូវបានដាក់ពង្រាយនៅលើទឹកដីអ៊ុយក្រែនទេ។

ផែនការនេះ ក៏មិនរាប់បញ្ចូលការបញ្ជូនអាវុធរយៈចម្ងាយឆ្ងាយ ដែលផលិតដោយសហរដ្ឋអាមេរិក ទៅ ប្រទេសនេះដែរ។

យោងតាមរបាយការណ៍ គំនិតផ្តួចផ្តើមនេះ ត្រូវបានព្រាងរួមគ្នាជាមួយរុស្ស៊ី។

កាលពីព្រឹកថ្ងៃពុធ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់សារព័ត៌មាន TASS ថា ទីក្រុងមូស្គូមិនបានទទួលព័ត៌មានណាមួយពីទីក្រុងវ៉ាស៊ីនតោន តាមរយៈបណ្តាញផ្លូវការទាក់ទងនឹង «កិច្ចព្រមព្រៀង» ស្តីពីអ៊ុយក្រែនដែលបានរាយការណ៍នៅក្នុងប្រព័ន្ធផ្សព្វផ្សាយនោះទេ។

នាពេលកន្លងទៅ អ្នកនាំពាក្យវិមានក្រឹមឡាំង លោក Dmitry Peskov បានឆ្លើយតបទៅនឹងសំណួររបស់ សារព័ត៌មានTASSថា ទីក្រុងមូស្គូ និងទីក្រុងវ៉ាស៊ីនតោន មិនទាន់បានធ្វើការលើគំនិតផ្តួចផ្តើមថ្មីណាមួយទាក់ទងនឹងដំណោះស្រាយអ៊ុយក្រែនលើសពីកិច្ចព្រមព្រៀងដែលសម្រេចបានដោយប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំអាមេរិក លោក ដូណាល់ ត្រាំ នៅរដ្ឋអាឡាស្កានោះទេ៕