យោធាប៉ាគីស្ថាន បាននិយាយកាលពីថ្ងៃអង្គារ (១៨ វិច្ឆិកា) ថា កងកម្លាំងសន្តិសុខប៉ាគីស្ថាន ដែលធ្វើសកម្មភាពក្រោមចារកម្មសម្ងាត់ បានចុះវាយឆ្មក់កន្លែងលាក់ខ្លួនរបស់ពួកសកម្មប្រយុទ្ធជាច្រើនទីតាំងនៅភាគពាយព្យនៃប្រទេស ក្បែរព្រំដែនអាហ្វហ្គានីស្ថាន ហើយបានសម្លាប់ពួកសកម្មប្រយុទ្ធ ៣៨នាក់។

សេចក្តីថ្លែងការណ៍របស់យោធាបាននិយាយថា កងទ័ពបានធ្វើប្រតិបត្តិការលើកដំបូងកាលពីថ្ងៃអាទិត្យកន្លងទៅ នៅស្រុក Dera Ismail Khan ជាស្រុកមួយក្នុងខេត្ត Khyber Pakhtunkhwa ដោយបានសម្លាប់ពួកតាលីបង់ប៉ាគីស្ថាន ១០នាក់។ ការវាយឆ្មក់លើកទីពីរនៅក្នុងស្រុក Waziristan ខាងជើងនៃតំបន់នេះ បានសម្លាប់ពួកសកម្មប្រយុទ្ធ ៥នាក់ទៀត រួមទាំងមេបញ្ជាការសកម្មប្រយុទ្ធម្នាក់។

សេចក្តីថ្លែងការណ៍បន្តថា នៅក្នុងការវាយឆ្មក់ពីរដងផ្សេងទៀតនៅទូទាំងស្រុក Bajaur និង Bannu ភាគពាយព្យ កងកម្លាំងសន្តិសុខបានសម្លាប់ពួកតាលីបង់ប៉ាគីស្ថាន ២៣នាក់ កាលពីថ្ងៃចន្ទសប្ដាហ៍នេះ។

យោធានេះបានកំណត់អត្តសញ្ញាណពួកសកម្មប្រយុទ្ធដែលត្រូវសម្លាប់ទាំងនោះថាជា "Khawarij" ជាពាក្យមួយដែលអាជ្ញាធរប្រើសម្រាប់ពួកសកម្មប្រយុទ្ធ ដែលត្រូវចោទប្រកាន់ថា មានការគាំទ្រដោយអាហ្វហ្គានីស្ថាន និងឥណ្ឌា រួមទាំងអ្នកដែលមានទំនាក់ទំនងជាមួយក្រុមសកម្មប្រយុទ្ធតាលីបង់ប៉ាគីស្ថាន (TTP)។ ទីក្រុងកាប៊ុល និងទីក្រុងញូវដេលី បានបដិសេធការចោទប្រកាន់ទាំងនោះ៕