របាយការណ៍របស់រដ្ឋាភិបាលវៀតណាម បាននិយាយនៅថ្ងៃព្រហស្បតិ៍ (២០ វិច្ឆិកា) នេះថា ចំនួនអ្នកស្លាប់ដោយសារភ្លៀងធ្លាក់ខ្លាំងជុំថ្មី ទឹកជំនន់ និងបំណាក់ដីនៅភាគកណ្តាលប្រទេសនេះ គិតចាប់តាំងពីចុងសប្តាហ៍មុនមក បានបន្តកើនឡើងមិនឈប់ឈរដល់ចំនួន ១៦នាក់ហើយ ដោយកម្រិតទឹកបានកើនឡើងកាន់តែគ្រោះថ្នាក់បន្ថែមទៀតក្នុងទីប្រជុំជន និងភូមិនានា ដែលរងការលិចលង់រួចទៅហើយ។

ភ្លៀងធ្លាក់លើសពី ១.៥០០មីលីម៉ែត្រ បានកើតមាននៅតំបន់ជាច្រើននៃភាគកណ្តាលប្រទេសវៀតណាម ក្នុងរយៈពេលបីថ្ងៃកន្លងមកនេះ។ តំបន់នេះគឺជាខ្សែក្រវាត់ផលិតកម្មកាហ្វេដ៏សំខាន់ ក៏ដូចជាឆ្នេរដ៏ពេញនិយមបំផុតរបស់ប្រទេស ប៉ុន្តែងាយនឹងកើតមានព្យុះ និងទឹកជំនន់ណាស់។ កាលពីថ្ងៃពុធ ពាណិជ្ជករបាននិយាយថា ទឹកជំនន់បានជន់លិចកសិដ្ឋានកាហ្វេ និងរារាំងការប្រមូលផលដែលកំពុងបន្តនៅក្នុងតំបន់។

គ្រោះទឹកជំនន់ និងបំណាក់ដីក៏បានធ្វើឱ្យមនុស្ស ៥នាក់បាត់ខ្លួន និងជន់លិចលំនៅឋានជាង ៤៣.០០០ខ្នង និងដំណាំជាង ១០.០០០ហិកតា នេះបើយោងតាមរបាយការណ៍ពីទីភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាល។ របាយការណ៍នេះបានឱ្យដឹងទៀតថា លំនៅឋាន និងអាជីវកម្មជាង ៥៥៣.០០០កន្លែង នៅតែប្រឈមនឹងការដាច់ចរន្តអគ្គិសនី បន្ទាប់ពីបណ្តាញថាមពលត្រូវបានខូចខាតដោយសារទឹកជំនន់៕