អ៊ីរ៉ង់៖ ​ក្រុម​មន្ត្រី​អ៊ីរ៉ង់ និង​សហរដ្ឋអាមេរិក​បា​ន​លើក​ឡើង​ថា កិច្ចពិភាក្សា​នៅ​ទីក្រុង​វី​យែ​នប្រទេស​អូទ្រីស ដើម្បី​ស្តារ​កិច្ចព្រមព្រៀង​នុយ​ក្លេ​អែរ​ឡើងវិញ​របស់​អ៊ីរ៉ង់ជិត​ដល់ទី​បញ្ចប់​ហើយ ដោយ​បង្កើន​ក្តី​សង្ឃឹមថា កិច្ចព្រមព្រៀង​នេះ​អាច​នឹង​ត្រូវបាន​ស្តារឡើងវិញ​ក្នុងពេល​ឆាប់ៗ​នេះ​។

​ប្រធាន​អ្នកចរចា​នុយក្លេអ៊ែរ​អ៊ីរ៉ង់លោក Ali Bagheri Kani បាន​និយាយ​កាលពី​ថ្ងៃ​ពុធ​ថា ភាគី​នានា​នៅក្នុង​រដ្ឋធានី​អូទ្រីស "​កាន់តែ​ខិតជិត​ជាង​ពេលណាៗ​ទាំងអស់​" ដើម្បី​ឈានដល់​កិច្ចព្រមព្រៀង​មួយ​។​ ចំណែក​នៅក្នុង​ទីក្រុងវ៉ាស៊ីនតោនវិញ ​អ្នកនាំពាក្យ​ក្រសួងការបរទេសលោក Ned Price បាន​និយាយថា ប៉ុន្មាន​ថ្ងៃ​ខាងមុខ​នឹង​សម្រេច​ថា ​តើ​កិច្ចព្រមព្រៀង​ដែល​ត្រូវបាន​គេ​ស្គាល់​ជា​ផ្លូវការ​ថា ​ជា​ផែនការ​សកម្មភាព​រួម​គ្រប់​ជ្រុងជ្រោយ (JCPOA) អាច​ត្រូវបាន​ស្ដារឡើងវិញ ឬ​អត់​។​

​លោក Price បាន​និយាយថា ដូចដែល​ខ្ញុំ​ធ្លាប់បាន​និយាយ​ពីមុន​អញ្ចឹង​ថា ការវាយតម្លៃ​របស់​យើង​គឺថា ​យើង​កំពុងស្ថិត​ក្នុងដំណាក់កាល​ចុងក្រោយ ដែលជា​ការចរចា​ដ៏​ស្មុគស្មាញ​ជាមួយ​ភាគី​ពាក់ព័ន្ធ​សំខាន់ៗ​នៅទីនេះ​។​ គួររម្លឹកថា កាលពី​ដើមខែ​នេះក្រុងវ៉ាស៊ីនតោន និង​ទីក្រុង​តេ​អេ​រ៉ង់បាន​បន្ត​ការចរចា​ដោយ​ប្រយោល​នៅក្នុង​ទីក្រុង​វី​យែ​ន ដើម្បី​ជួយសង្គ្រោះ​កិច្ចព្រមព្រៀង​នេះជា​ផ្នែក​មួយ​នៃ​ការចរចា​ចំនួន ៨​ជុំ​៕

អត្ថបទ៖ សុខមាន