ប្រធានាធិបតីអាមេរិក លោក Donald Trump ត្រូវបានគេដឹងថា បាន «អនុម័តដោយស្ងាត់» នូវផែនការសន្តិភាព ពាក់ព័ន្ធនឹងជម្លោះរុស្ស៊ី និងអ៊ុយក្រែន ជាអ្វីដែលអាចជាការទម្លាយភាពទាល់ច្រក ដើម្បីនាំឲ្យការប្រយុទ្ធគ្នា រវាងប្រទេសទាំង២ ឈានដល់ទីបញ្ចប់នៅទីបំផុត។

បើយោងតាមសេចក្ដីរាយការណ៍ពីប្រព័ន្ធផ្សព្វផ្សាយ NBC News បានឲ្យដឹងថា លោក Trump នៅសប្តាហ៍នេះ បានអនុម័តផែនការ ២៨ចំណុច ដែលត្រូវបានរៀបចំឡើង ដើម្បីនាំឲ្យមានសន្តិភាព រវាងរុស្ស៊ី និងអ៊ុយក្រែន។

សេចក្ដីរាយការណ៍នេះបានឲ្យដឹងទៀតថា មន្ត្រីជាន់ខ្ពស់របស់រដ្ឋបាលលោក Trump បាន «បង្កើតផែនការនេះយ៉ាងស្ងាត់ៗ» ក្នុងរយៈពេលប៉ុន្មានសប្តាហ៍ចុងក្រោយនេះ ជាការពិគ្រោះយោបល់ជាមួយបេសកជនរុស្ស៊ី លោក Kirill Dmitriev និងមន្ត្រីអ៊ុយក្រែន។

ផែនការនេះត្រូវបានរាយការណ៍ដំបូងគេដោយសារព័ត៌មាន Axios ដែលបានឲ្យដឹងថា សំណើរបស់សហរដ្ឋអាមេរិកនេះ ត្រូវបានបំផុសគំនិតដោយផែនការសន្តិភាពតំបន់ហ្កាហ្សាចំនួន ២០ចំណុចរបស់លោក Trump ។

តែយ៉ាងណាក្ដី មន្ត្រីដែលត្រូវបានដកស្រង់នៅក្នុងសេចក្ដីរាយការណ៍របស់ប្រព័ន្ធផ្សព្វផ្សាយ NBC បានបដិសេធមិនចែករំលែកនូវភាពជាក់លាក់នៃសំណើសន្តិភាពនេះឡើយ ដោយកត់សម្គាល់ថា វានៅតែជាកម្មវត្ថុនៃការចរចា ក្នុងចំណោមភាគីពាក់ព័ន្ធសំខាន់ៗ៕