អង្គការឃ្លាំមើលសិទ្ធិមនុស្ស (HRW) នៅថ្ងៃព្រហស្បតិ៍ (ទី២០ ខែវិច្ឆិកា) នេះ បានលើកឡើងថា ការបណ្តេញជនជាតិប៉ាឡេស្ទីនរាប់ម៉ឺននាក់ចេញពីជំរំជនភៀសខ្លួនចំនួន ៣ នៅតំបន់ West Bank កាលពីដើមឆ្នាំ២០២៥ ស្មើនឹងការប្រព្រឹត្តិឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ដោយអំពាវនាវឲ្យមានវិធានការអន្តរជាតិជាបន្ទាន់ ដើម្បីឲ្យមន្ត្រីអ៊ីស្រាអែលទទួលខុសត្រូវ និងបញ្ឈប់រំលោភការបំពានបន្ថែមទៀត។

ក្រុមសិទ្ធិមនុស្សនេះបានបញ្ជាក់ថា អ្នកស្រុកប្រហែល ៣២.០០០នាក់នៃជំរំ Jenin, Tulkarm និង Nur Shams ត្រូវបានបង្ខំឲ្យបម្លាស់ទីលំនៅដោយកងកម្លាំងអ៊ីស្រាអែល ក្នុងអំឡុងពេលមាន «ប្រតិបត្តិការជញ្ជាំងដែក» (Operation Iron Wall) ក្នុងខែមករា និងកុម្ភៈ។ របាយការណ៍ចំនួន ១០៥ទំព័ររបស់ស្ថាប័ននេះ ដែលមានចំណងជើងថា «សុបិនទាំងអស់របស់ខ្ញុំត្រូវបានបំផ្លាញ» បានរៀបរាប់ថា ជនភៀសខ្លួនត្រូវបានរារាំងមិនឲ្យវិលត្រឡប់ទៅវិញ ហើយផ្ទះរាប់រយខ្នងត្រូវបានកម្ទេចចោល។

អ្នកស្រាវជ្រាវនៃអង្គការឃ្លាំមើលសិទ្ធិមនុស្សនេះ គឺលោកស្រី Melina Ansari ដែលបានធ្វើការលើរបាយការណ៍នេះ បាននិយាយទៅកាន់ទីភ្នាក់ងារសារព័ត៌មាន Reuters កាលពីថ្ងៃពុធថា «១០ខែបន្ទាប់ពីមានការធ្វើបម្លាស់ទីលំនៅរបស់ពួកគេ គ្មានអ្នកស្រុកនៅក្នុងគ្រួសារណាមួយ អាចត្រឡប់ទៅកាន់ផ្ទះសម្បែងរបស់ពួកគេវិញឡើយ»។

នៅក្នុងសេចក្តីថ្លែងការណ៍មួយទៅកាន់សារប័ត៌មាន Reuters កាលពីថ្ងៃពុធ យោធាអ៊ីស្រាអែលបានឲ្យដឹងថា ខ្លួនត្រូវការកម្ទេចហេដ្ឋារចនាសម្ព័ន្ធស៊ីវិល ដើម្បីកុំឲ្យពួកសកម្មប្រយុទ្ធឆ្លៀតឱកាស។ តែយ៉ាងណាក្ដី យោធាមិនបានបញ្ជាក់ថា តើអ្នកស្រុកទាំងអស់អាចត្រឡប់ទៅវិញនៅពេលណានោះទេ៕