សភាអ៊ុយក្រែន កាលពីថ្ងៃពុធ (ទី១៩ ខែវិច្ឆកា) បានបោះឆ្នោតបណ្តេញរដ្ឋមន្ត្រីយុត្តិធម៌ លោក Herman Halushchenko និងរដ្ឋមន្ត្រីថាមពល លោកស្រី Svitlana Hrynchuk ស្របពេលមានការស៊ើបអង្កេតដែលកំពុងបន្តមាន អំពីអំពើពុករលួយ នៅក្នុងវិស័យថាមពលរបស់ប្រទេស។

ទីភ្នាក់ងារសារព័ត៌មានរដ្ឋ Ukrinform បានរាយការណ៍ថា សមាជិកសភាសរុបចំនួន ៣២៣នាក់ បានគាំទ្រដល់ការសម្រេចចិត្តលាលែងពីតំណែងរបស់លោក Halushchenko ខណៈដែលការបណ្តេញលោកស្រី Hrynchuk ត្រូវបានគាំទ្រដោយសំឡេង ៣១៥។

បើយោងតាមសេចក្ដីរាយការណ៍នោះ បានឲ្យដឹងថា លោក Halushchenko លោកស្រី Hrynchuk និងលោកស្រីនាយករដ្ឋមន្ត្រី Yulia Svyrydenko មិនបានចូលរួមសម័យប្រជុំនេះទេ ដោយធ្វើឲ្យតំណាងរាស្ត្រទាំងនោះខឹងសម្បា ដែលបានរំពឹងថា ពួកគេនឹងរាយការណ៍ទៅសភា ខណៈដែលប្រធានសភា លោក Ruslan Stefanchuk បាននិយាយថា ឥស្សរជនទាំងនោះត្រូវបានជូនដំណឹង អំពីសម័យប្រជុំនេះ។

ញត្តិនេះត្រូវបានលើកមកដោយឧបនាយករដ្ឋមន្ត្រី លោក Taras Kachka ដែលបាននិយាយថា សំណើនេះត្រូវបានផ្សារភ្ជាប់ទៅនឹង «ការតវ៉ាជាសាធារណៈ ជុំវិញការស៊ើបអង្កេតដែលកំពុងបន្តមាន»។ លោក Stefanchuk បានចុះហត្ថលេខាលើការបណ្តេញចេញពីតួនាទីនេះភ្លាមៗ បន្ទាប់ពីបញ្ចប់ដំណើរការបោះឆ្នោត។

ទីភ្នាក់ងារប្រឆាំងអំពើពុករលួយ កំពុងស៊ើបអង្កេតការទទួលប្រាក់ដោយខុសច្បាប់ ១០០លានដុល្លារ និងគម្រោងសម្អាតប្រាក់កខ្វក់ដែលពាក់ព័ន្ធនឹងមន្ត្រីថាមពលជាន់ខ្ពស់។ ស្ថាប័នទាំងនោះបានចោទប្រកាន់ពាណិជ្ជករ លោក Timur Mindich ថា ជាអ្នកនៅពីក្រោយរឿងអាស្រូវនេះ។ លោកប្រធានាធិបតី Volodymyr Zelenskyy បានអំពាវនាវឲ្យមានការសុំលាលែងពីតំណែង សម្រាប់លោក Halushchenko ដែលធ្លាប់ធ្វើជារដ្ឋមន្ត្រីថាមពល និងលោកស្រី Hrynchuk ដែលបានចុះចេញពីតំណែងផងដែរ៕