ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas នៅថ្ងៃព្រហស្បតិ៍ (ទី២០ ខែវិច្ឆិកា) នេះ បានលើកឡើងថា ទីក្រុងគីវ និងអឺរ៉ុប ចាំបាច់ត្រូវចូលរួមនៅក្នុងផែនការសន្តិភាពណាមួយ នៅប្រទេសអ៊ុយក្រែន ខណៈដែលសហរដ្ឋអាមេរិកជំរុញឲ្យសំណើថ្មីដែលហាក់ដូចជាបញ្ជាក់ជាថ្មីនូវការទាមទាររបស់រុស្ស៊ី។

មុនកិច្ចប្រជុំរដ្ឋមន្ត្រីការបរទេសសហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្ស៊ិក លោកស្រី Kallas បានប្រាប់អ្នកសារព័ត៌មានថា៖ «សម្រាប់ផែនការណាមួយ ដែលអាចដំណើរការទៅបាន វាត្រូវតែមានអ៊ុយក្រែន និងអឺរ៉ុបនៅក្នុងនោះដែរ»។

លោកស្រីបានបញ្ជាក់បន្ថែមថា៖ «យើងត្រូវតែដឹងឲ្យបានច្បាស់ថា នៅក្នុងសង្រ្គាមនេះ មានអ្នកឈ្លានពានម្នាក់ និងជនរងគ្រោះម្នាក់។ ដូច្នេះ យើងមិនបានឮ អំពីការធ្វើសម្បទានណាមួយពីភាគីរុស្ស៊ីនោះឡើយ»។

គួរបញ្ជាក់ថា ប្រភពដែលដឹងពីសំណើរបស់អាមេរិក បានប្រាប់សារព័ត៌មានមួយកាលពីថ្ងៃពុធថា ផែនការនោះនឹងឃើញទីក្រុងគីវព្រមប្រគល់ដែនដីទៅឲ្យទីក្រុងមូស្គូ និងការកាត់កងទ័ពជាងពាក់កណ្តាល។ ចំណែកសារព័ត៌មាន Axios របស់អាមេរិក បានរាយការណ៍នៅមុននេះថា ទីក្រុងមូស្គូ និងវ៉ាស៊ីនតោន បាននិងកំពុងធ្វើការលើផែនការសម្ងាត់ ដើម្បីបញ្ចប់សង្រ្គាមដែលមានរយៈពេលជិត ៤ឆ្នាំនេះ។

យ៉ាងណាក្ដី លោកស្រី Kallas បាននិយាយថា តាមដែលលោកស្រីបានដឹង មិនមានការចូលរួមពាក់ព័ន្ធពីអ៊ុយក្រែន ឬពីអ្នកគាំទ្រអឺរ៉ុបឡើយ។ លោកស្រីបានសង្កត់ធ្ងន់ថា៖ «យើងស្វាគមន៍រាល់កិច្ចខិតខំប្រឹងប្រែងប្រកបដោយអត្ថន័យ ដើម្បីបញ្ចប់សង្រ្គាមនេះ ប៉ុន្តែដូចដែលយើងបាននិយាយពីមុនមកហើយថា វាត្រូវតែមានភាពយុត្តិធម៌ និងយូរអង្វែង»៕