ក្រុមរដ្ឋមន្រ្តីការបរទេសសហភាពអឺរ៉ុប(EU)និយាយនៅថ្ងៃព្រហស្បតិ៍នេះថា រាល់ផែនការបញ្ចប់សង្រ្គាមនៅអ៊ុយក្រែន ត្រូវតែរួមបញ្ចូលទីក្រុងគីវ និងអឺរ៉ុប ក្រោយសហរដ្ឋអាមេរិកដាក់ចេញនូវក្របខណ្ឌមួយដែលនឹងធ្វើឲ្យអ៊ុយក្រែន បោះបង់ទឹកដី និងអាវុធមួយចំនួនរបស់ខ្លួន ព្រមទាំងកាត់បន្ថយទំហំកងទ័ពរបស់ពួកគេផងដែរ ។

ប្រធានាធិបតីអាមេរិក លោក Donald Trump ត្រូវបានគេដឹងថា បានអនុម័តដោយស្ងាត់នូវផែនការសន្តិភាព ពាក់ព័ន្ធនឹងជម្លោះរុស្ស៊ី និងអ៊ុយក្រែន ជាអ្វីដែលអាចជាការទម្លាយភាពទាល់ច្រក ដើម្បីនាំឲ្យការប្រយុទ្ធគ្នា រវាងប្រទេសទាំង២ ឈានដល់ទីបញ្ចប់នៅទីបំផុត ។

បើយោងតាមសេចក្ដីរាយការណ៍ពីប្រព័ន្ធផ្សព្វផ្សាយ NBC News បានឲ្យដឹងថា ក្នុងសប្តាហ៍នេះ លោក Trump បានអនុម័តផែនការ ២៨ចំណុច ដែលត្រូវបានរៀបចំឡើង ដើម្បីនាំឲ្យមានសន្តិភាព រវាងរុស្ស៊ី និងអ៊ុយក្រែន ។

សេចក្ដីរាយការណ៍នេះបានឲ្យដឹងទៀតថា មន្ត្រីជាន់ខ្ពស់របស់រដ្ឋបាលលោក Trump បាន «បង្កើតផែនការនេះយ៉ាងស្ងាត់ៗ» ក្នុងរយៈពេលប៉ុន្មានសប្តាហ៍ចុងក្រោយនេះ ជាការពិគ្រោះយោបល់ជាមួយបេសកជនរុស្ស៊ី លោក Kirill Dmitriev និងមន្ត្រីអ៊ុយក្រែន។ ផែនការនេះត្រូវបានរាយការណ៍ដំបូងគេដោយសារព័ត៌មាន Axios ដែលបានឲ្យដឹងថា សំណើរបស់សហរដ្ឋអាមេរិកនេះ ត្រូវបានបំផុសគំនិតដោយផែនការសន្តិភាពតំបន់ហ្កាហ្សាចំនួន ២០ចំណុចរបស់លោក Trump ។

ផែនការបែបនេះ នឹងតំណាងឲ្យដំណើរថយក្រោយដ៏សំខាន់មួយសម្រាប់ទីក្រុងគីវ ស្របពេលដែលពួកគេប្រឈមនឹងការបាត់បងទឹកដីបន្ថែមទៀតពីការដណ្តើមរបស់រុស្ស៊ី នៅតំបន់ភាគខាងកើត ហើយនិងខណៈពេលដែលប្រធានាធិបតីអ៊ុយក្រែនលោក Zelenskiy កំពុងដោះស្រាយរឿងអាស្រូវពុករលួយដែលមើលឃើញសភាបណ្តេញរដ្ឋមន្រ្តីថាមពល និងយុត្តិធម៌ចេញពីតំណែងកាលពីថ្ងៃពុធ ។

សេតវិមានបដិសេធន៍ពុំបានធ្វើសេចក្តីអត្ថាធិប្បាយណាមួយលើបញ្ហាមួយនេះឡើយ ៕