ប្រធាននាយសេនាធិការរុស្ស៊ី បានរាយការណ៍ប្រាប់លោកប្រធានាធិបតី Vladimir Putin កាលពីថ្ងៃព្រហស្បតិ៍ (២០ វិច្ឆិកា) ថា កងកម្លាំងរុស្ស៊ី បានវាយដណ្ដើមយកបានទីក្រុង Kupiansk នៅភាគឦសាន របស់អ៊ុយក្រែនហើយ ប៉ុន្តែយោធាអ៊ុយក្រែន បានបដិសេធការអះអាងនេះ។

អ៊ុយក្រែន ថែមទាំងបដិសេធសេចក្ដីថ្លែងការណ៍របស់រុស្ស៊ី ដែលថា កងកម្លាំងខ្លួនវាយយកបានផ្នែកធំៗនៃទីក្រុងដ៏សំខាន់ពីរទៀត នោះគឺមជ្ឈមណ្ឌលភស្តុភារ Pokrovsk ដែលរុស្ស៊ីប្រឹងប្រែងវាយយកអស់ជាច្រើនខែមកហើយ រួមទាំងទីក្រុង Vovchansk នៅជិតព្រំដែនរុស្ស៊ី។

វិមានក្រឹមឡាំងនិយាយថា លោក Putin បានចុះទៅពិនិត្យប៉ុស្តិ៍បញ្ជាការនៃក្រុម "ភាគខាងលិច" នៃកងកម្លាំងរុស្ស៊ី ជាទីដែលលោកបានជួបជាមួយប្រធានបុគ្គលិក Valery Gerasimov និងប្រមុខយោធានៅទីនោះ។ ក្នុងវីដេអូមួយដែលបង្ហោះលើគេហទំព័រវិមានក្រឹមឡាំង លោក Gerasimov បានប្រាប់លោក Putin ថា "អង្គភាពខាងលិច" បានរំដោះក្រុង Kupiansk រួចហើយ ហើយកំពុងបន្តកម្ទេចអង្គភាពនៃកងកម្លាំងប្រដាប់អាវុធអ៊ុយក្រែន ដែលប្រមូលផ្ដុំនៅច្រាំងខាងឆ្វេងនៃទន្លេ Oskol"។

លោក Gerasimov ដែលអង្គុយទល់មុខលោក Putin ក្នុងវីដេអូនោះ បានប្រាប់ប្រធានាធិបតីរុស្ស៊ីរូបនេះថា កងកម្លាំងទីក្រុងមូស្គូ កាន់កាប់បាន ៧០% នៃក្រុង Pokrovsk ហើយ និងជាង ៨០% នៃក្រុង Vovchansk ក៏ស្ថិតក្រោមការគ្រប់គ្រងរបស់រុស្ស៊ីផងដែរ។

នៅល្ងាចថ្ងៃដដែលនោះ យោធាអ៊ុយក្រែនបានចេញបដិសេធថា "នាយសេនាធិការនៃកងកម្លាំងប្រដាប់អាវុធអ៊ុយក្រែន សូមប្រកាសថា ក្រុង Kupiansk កំពុងស្ថិតក្រោមការគ្រប់គ្រងរបស់កងកម្លាំងការពារអ៊ុយក្រែន ហើយជាមួយគ្នានេះ សេចក្តីថ្លែងការណ៍ដែលថាផ្នែក ៨០% នៃ Vovchansk ក្នុងតំបន់ Kharkiv និង ៧០% នៃក្រុង Pokrovsk ត្រូវរបូតចេញពីដៃអ៊ុយក្រែននោះ ក៏ជារឿងមិនពិតផងដែរ"៕