ក្រុមអាជ្ញាធរសុខាភិបាលហ្កាហ្សានិយាយថា ការវាយប្រហារតាមអាកាសថ្មីរបស់អ៊ីស្រាអែលបានសម្លាប់មនុស្សបួននាក់ទៀតកាលពីថ្ងៃព្រហស្បតិ៍២០ វិច្ឆិកា សប្ដាហ៍នេះ ខណៈប្រទេសកាតា ដែលជាអ្នកសម្របសម្រួលបទឈប់បាញ់រយៈពេលជាច្រើនសប្តាហ៍ បានព្រមានថា ការវាយប្រហារឡើងវិញបានគំរាមកំហែងដល់ការបំផ្លិចបំផ្លាញបទឈប់បាញ់ដ៏ផុយស្រួយរវាងអ៊ីស្រាអែល និងហាម៉ាស។   

ការវាយប្រហារថ្មីៗទាំងនេះបានកើតឡើងនៅពេលព្រឹកបន្ទាប់ពីការវាយប្ររហារដ៏សាហាវបំផុតមួយក្នុងចំណោមការវាយប្រហារជាច្រើនរយៈពេលប៉ុន្មានថ្ងៃមកនេះនៅហ្កាហ្សា ចាប់តាំងពីបទឈប់បាញ់ ចូលជាធរមានកាលពីថ្ងៃទី១០តុលា និងបន្ទាប់ពីអ៊ីស្រាអែល បើកការវាយប្រហារជាបន្តបន្ទាប់ ផ្តោតលើក្រុមហេសបូឡានៅលីបង់ ទោះមានបទឈប់បាញ់ជិតមួយឆ្នាំនៅទីនោះក៏ដោយ។  

ក្រុមមន្ត្រីក្នុងតំបន់ហ្កាហ្សាបាននិយាយថា ការវាយប្រហារតាមអាកាសរបស់អ៊ីស្រាអែលលើតំបន់ហ្កាហ្សាបានសម្លាប់មនុស្ស ២៧ នាក់កាលពីថ្ងៃពុធ១៩វិច្ឆិកាសប្ដាហ៍នេះ ដោយភាគីអ៊ីស្រាអែល និងហាម៉ាស ចោទដាក់គ្នា ថាបានរំលោភលើបទឈប់បាញ់ដ៏ផុយស្រួយនៅក្នុងទឹកដីប៉ាឡេស្ទីនមួយនេះ ។ 

មន្ទីរពេទ្យ Nasser ក្នុងទីក្រុង Khan Younis ភាគខាងត្បូងហ្កាហ្សានិយាយថា មនុស្សបួននាក់ត្រូវបានសម្លាប់ក្នុងការវាយប្រហារនៅព្រឹកព្រលឹមថ្ងៃព្រហស្បតិ៍ បន្ទាប់ពីទីភ្នាក់ងារការពារជនស៊ីវិលរបស់តំបន់នេះ ដែលដំណើរការក្រោមអាជ្ញាធរហាម៉ាស បានផ្តល់ចំនួនអ្នកស្លាប់បីនាក់។  

មន្ទីរពេទ្យនេះនិយាយថា សមាជិកបីនាក់មកពីគ្រួសារមួយ រួមទាំងក្មេងស្រីអាយុមួយឆ្នាំម្នាក់ ត្រូវបានសម្លាប់ក្នុងការវាយប្រហារលើផ្ទះមួយនៅខាងកើតទីក្រុង Khan Younis និងមនុស្សម្នាក់ទៀតត្រូវបានសម្លាប់ក្នុងការវាយប្រហារតាមអាកាសលើទីប្រជុំជន Abasan al-Kabira ដែលក៏ស្ថិតនៅភាគខាងកើតទីក្រុង Khan Younis ផងដែរ។កាតា ដែលជាអ្នកសម្របសម្រួលដ៏សំខាន់មួយក្នុងសង្គ្រាមហាម៉ាស-អ៊ីស្រាអែល បានថ្កោលទោសអ្វីដែលខ្លួនហៅថាការវាយប្រហារតាមអាកាសដ៏ឃោរឃៅរបស់អ៊ីស្រាអែល ដែលគំរាមកំហែងដល់ការបំផ្លាញកិច្ចព្រមព្រៀងឈប់បាញ់កំពុងរង្គោះរអង្គើរយៈពេលប្រមាណ៦សប្ដាហ៍មកនេះ ៕