រលកនៃការតវ៉ាគាំទ្រក្រុមសកម្មភាពដើម្បីប៉ាឡេស្ទីន Palestine Action ដែលត្រូវបានហាមប្រាមកំពុងដំណើរការក្នុងទីក្រុងតូចធំនានាទូទាំងចក្រភពអង់គ្លេស មុនពេលមានសំណុំរឿងតុលាការសំខាន់មួយនៅសប្តាហ៍ក្រោយ ។   

មនុស្សប្រហែល ៤៧ នាក់ត្រូវបានចាប់ខ្លួនកាលពីថ្ងៃព្រហស្បតិ៍២០វិច្ឆិកាសប្ដាហ៍នេះ នៅទីក្រុងឡុងដ៍្រ ខណៈមនុស្សរាប់សិបនាក់បានប្រមូលផ្តុំគ្នានៅខាងក្រៅក្រសួងយុត្តិធម៌ ដោយកាន់បដាដែលសរសេរថា "ខ្ញុំប្រឆាំងនឹងការប្រល័យពូជសាសន៍។ ខ្ញុំគាំទ្រសកម្មភាពប៉ាឡេស្ទីន"។ 

ប្រសិនបើពួកគេត្រូវបានចោទប្រកាន់ និងកាត់ទោសក្រោមច្បាប់ភេរវកម្មរបស់ចក្រភពអង់គ្លេស ពួកគេអាចប្រឈមនឹងការជាប់ពន្ធនាគាររហូតដល់ប្រាំមួយខែ ចំពោះការកាន់បដាបែបនេះ។

មានបាតុកម្មជាច្រើននៅក្នុងទីក្រុង និងទីប្រជុំជនប្រហែល ២០ កាលពីថ្ងៃអង្គារសប្ដាហ៍នេះ ដោយមានមនុស្សប្រហែល ១៤២ នាក់ត្រូវបានចាប់ខ្លួនក្នុងចំណោមអ្នកតវ៉ា ២៤០ នាក់ នេះបើយោងតាមអ្នករៀបចំការតវ៉ា Defend Our Juries។ 

មនុស្សជាង ២.០០០ នាក់ត្រូវបានចាប់ខ្លួនចាប់តាំងពីសកម្មភាពប៉ាឡេស្ទីនត្រូវបានហាមប្រាមក្នុងខែកក្កដា ដោយចាត់ទុកជាក្រុមភេរវករ ដែលធ្វើឱ្យការបញ្ចេញមតិ ឬបង្ហាញការគាំទ្រណាមួយសម្រាប់ពួកគេក្លាយជារឿងខុសច្បាប់។   

កាលពីថ្ងៃព្រហស្បតិ៍សប្ដាហ៍នេះដែរ នគរបាលទីក្រុងឡុងដ៍្របានប្រកាសថា មនុស្ស ១២០ នាក់ត្រូវបានចោទប្រកាន់ពីបទគាំទ្រក្រុមនេះ បន្ទាប់ពីចូលរួមការតវ៉ាកាលពីថ្ងៃទី ៩ សីហា ក្នុងរដ្ឋធានីអង់គ្លេស។ រហូតមកដល់ពេលនេះ មនុស្ស ២៥៤ នាក់ត្រូវបានចោទប្រកាន់ ៕