កិច្ចពិភាក្សាកាលពីថ្ងៃព្រហស្បតិ៍ (២០ វិច្ឆិកា) នៅឯកិច្ចប្រជុំកំពូលស្តីពីអាកាសធាតុ COP30 ក្នុងប្រទេសប្រេស៊ីល ត្រូវបានរំខាន បន្ទាប់ពីអគ្គិភ័យមួយបានឆាបឆេះនៅបរិវេណព្រឹត្តិការណ៍នោះ ដែលបង្កឱ្យមានការជម្លៀសចេញយ៉ាងវឹកវរ ខណៈអ្នកចរចាកំពុងព្យាយាមសម្រេចកិច្ចព្រមព្រៀងមួយស្ដីពីអាកាសធាតុអន្តរជាតិ។

អគ្គលេខាធិការអង្គការសហប្រជាជាតិ លោក Antonio Guterres ក៏បានអំពាវនាវឱ្យមានកិច្ចព្រមព្រៀងឆាប់ៗក្នុងកិច្ចប្រជុំកំពូលនៅទីក្រុងព្រៃអាម៉ាហ្សូន Belem របស់ប្រេស៊ីលនេះ ដោយជំរុញឱ្យមានភាពច្បាស់លាស់លើប្រធានបទក្តៅគគុកនៃការផ្តាច់ពីឥន្ធនៈហ្វូស៊ីល ហើយងាកទៅប្រើថាមពលស្អាត។

នៅមិនដល់ ២៤ម៉ោងទៀតទេ កិច្ចប្រជុំកំពូលនេះនឹងដល់ទីបញ្ចប់ ខណៈបំណងស្វះស្វែងរកការឯកភាពក្នុងចំណោមអ្នកចូលរួមជិត ២០០ប្រទេសមកពីជុំវិញពិភពលោក ហាក់មិនទាន់សម្រេច។ ប្រទេសម្ចាស់ផ្ទះ ប្រេស៊ីល បាននិយាយថា កិច្ចព្រមព្រៀងមួយពីក្នុងជំនួបនេះគឺជាជំហានដ៏សំខាន់ឆ្ពោះទៅរកការបង្កើនសកម្មភាពផ្នែកអាកាសធាតុអន្តរជាតិ។

យ៉ាងណាមិញ បន្តិចក្រោយមកនៅពេលអាហារថ្ងៃត្រង់ មានអគ្គិភ័យមួយផ្ទុះឡើង ដោយវីដេអូកាមេរ៉ាសុវត្ថិភាពបានបង្ហាញឱ្យឃើញ អណ្តាតភ្លើងឆាបឆេះនៅកន្លែងតាំងពិព័រណ៌ ហើយបានរាលដាលយ៉ាងឆាប់រហ័សតាមជញ្ជាំង និងពិដាននៃអគារ ប៉ុន្តែក្រោយមកត្រូវបានពន្លត់វិញ។

អ្នករៀបចំនិយាយថា មនុស្សមួយចំនួនរងរបួស ហើយសេវាអគ្គិភ័យក្នុងតំបន់និយាយថា ករណីឆេះនេះអាចបណ្តាលមកពីឆ្លងអគ្គិសនី ទំនងជាដោយសារឧបករណ៍មីក្រូវ៉េវ ប៉ុន្តែចំហេះត្រូវគ្រប់គ្រងបានទាំងស្រុងហើយ។ អំឡុងពេលភាពវឹកវរ គណៈប្រតិភូរាប់ពាន់នាក់ត្រូវជម្លៀសចេញទៅទីសុវត្ថិភាព៕