ក្រុមជួយសង្រ្គោះនៅវៀតណាម បានបន្តជម្លៀសប្រជាជនដែលជាប់គាំងក្នុងផ្ទះសម្បែងរបស់ពួកគេ ខណៈទឹកជំនន់ដ៏រីករាលដាល បានជន់លិចភាគកណ្តាលនៃប្រទេសនេះ ជាទីដែលអាជ្ញាធរបាននិយាយកាលពីថ្ងៃព្រហស្បតិ៍ (២០ វិច្ឆិកា) ថា មនុស្សយ៉ាងតិច ៤១នាក់បានស្លាប់ នៅក្នុងសប្ដាហ៍នេះ។

របាយការណ៍ប្រព័ន្ធផ្សព្វផ្សាយរដ្ឋបានឱ្យដឹងថា ទឹកជំនន់បានលិចលង់លំនៅឋានជាង ៥២.០០០ខ្នង ហើយបានធ្វើឱ្យអាជីវកម្ម និងអ្នកស្រុកកន្លះលាននាក់ គ្មានថាមពលអគ្គិសនីប្រើប្រាស់ ខណៈការស្វែងរកនៅតែបន្តសម្រាប់មនុស្ស ៩នាក់ ដែលនៅតែបាត់ខ្លួន។

តំបន់ដែលរងគ្រោះខ្លាំងជាងគេ រួមមានទីក្រុងឆ្នេរសមុទ្រ Hoi An និង Nha Trang ក៏ដូចជាខ្សែក្រវាត់ផលិតកម្មកាហ្វេដ៏សំខាន់មួយនៅតំបន់ខ្ពង់រាបភាគកណ្តាល ជាទីដែលកសិករជួបការលំបាករួចទៅហើយក្នុងការប្រមូលផល ដោយសារតែព្យុះលើកមុន។

អាកាសធាតុធ្ងន់ធ្ងរបានវាយលុកវៀតណាម ក្នុងប៉ុន្មានខែថ្មីៗនេះ។ ព្យុះទីហ្វុងចំនួនពីរគឺ Kalmaegi និង Bualoi បានសម្លាប់មនុស្សជាច្រើន និងបង្កការបំផ្លិចបំផ្លាញយ៉ាងសន្ធឹកសន្ធាប់ក្នុងប៉ុន្មានសប្តាហ៍កន្លងទៅ។ យោងតាមការប៉ាន់ប្រមាណរបស់រដ្ឋាភិបាលបានឱ្យដឹងថា គ្រោះមហន្តរាយធម្មជាតិនៅទូទាំងប្រទេសវៀតណាម បានបង្កការខូចខាតដល់ទៅ ២ពាន់លានដុល្លារអាមេរិក នៅចន្លោះខែមករា ដល់ខែតុលា ឆ្នាំ២០២៥នេះ៕