បាល់ទាត់៖ ក្លិបបាល់ទាត់អធិរាជដំរីឦសាននៃខេត្តរតនគិរី បានទទួលជោគជ័យលើសការរំពឹងទុកក្នុងការដាក់លក់សំបុត្រចូលទស្សនា ការប្រកួតពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ខេត្ត) ឆ្នាំ២០២២ ក្នុងការប្រកួតជាមួយសមាគមកីឡាខេត្តព្រះវិហារកាលពីល្ងាចថ្ងៃទី១៦ ខែកុម្ភៈម្សិលមិញ។
លោក អ៊ួន ឧត្តម អគ្គលេខាធិការក្លិបបានបញ្ជាក់ថា នេះជាលើកដំបូងហើយដែលក្លិបបានសម្រេច ដាក់លក់សំបុត្រចូលទស្សនាការប្រកួត បន្ទាប់ពីក្លិបចង់បង្កើតវប្បធម៌គាំទ្រមួយសម្រាប់អ្នកខេត្តរតនគិរី តាមរយៈការសិក្សាជាមួយគណៈកម្មាធិការប្រតិបត្ដិក្លិប និងសហព័ន្ធកីឡាបាល់ទាត់កម្ពុជារហូតឈានដល់ការលក់សំបុត្រជាផ្លូវការ និងទទួលបានជោគជ័យ។ គួរដឹងថា សម្រាប់ការប្រកួតក្នុងដីលើកដំបូងក្នុងយុទ្ធនាការប្រកួតពានរង្វាន់សម្ដេចតេជោ ហ៊ុន សែន-ថ្នាក់ខេត្តឆ្នាំនេះ ក្រុមអធិរាជដំរីឦសានបានយកឈ្នះខេត្តព្រះវិហារ ដោយលទ្ធផល ៤-០។ ជ័យជម្នះនេះបានធ្វើឲ្យពួកគេឈរកំពូលតារាងពូល D ជាបណ្ដោះអាសន្នដោយមាន ៤ពិន្ទុស្មើគ្នាជាមួយខេត្តមណ្ឌលគិរីបន្ទាប់ពីឆ្លងកាត់ ២ប្រកួតឈ្នះ ១ និងស្មើ ១ ដូចគ្នា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
