សហភាពអឺរ៉ុប (EU)កាលពីថ្ងៃព្រហស្បតិ៍ បានជំរុញឲ្យកំណែទម្រង់អាជ្ញាធរប៉ាឡេស្ទីន(PA) ជាផ្នែកមួយនៃផែនការបញ្ចប់សង្គ្រាមហ្កាហ្សា ខណៈដែលទីក្រុងប្រ៊ុចសែល បានរៀបចំគណៈប្រតិភូចំនួន ៦០ ដើម្បីពិភាក្សាអំពីការកសាងឡើងវិញ និងអភិបាលកិច្ច។

ប្លុកដែលមានប្រទេសចំនួន ២៧ ដែលជាអ្នកគាំទ្រផ្នែកហិរញ្ញវត្ថុដ៏ធំបំផុតរបស់ប៉ាឡេស្ទីន កំពុងសម្លឹងមើលតួនាទីដ៏លេចធ្លោជាងមុន បន្ទាប់ពីត្រូវបានទុកចោលភាគច្រើននៅខាងក្រៅកិច្ចខិតខំប្រឹងប្រែងរបស់ប្រធានាធិបតីអាមេរិក លោក ដូណាល់ ត្រាំ ដើម្បីបញ្ចប់សង្គ្រាមរវាងអ៊ីស្រាអែលនិងក្រុមហាម៉ាស។

ស្នងការសហភាពអឺរ៉ុបប្រចាំតំបន់មេឌីទែរ៉ាណេ លោកស្រី Dubravka Suica បាននិយាយថា៖«គោលបំណងរបស់យើង គឺពង្រឹងអភិបាលកិច្ច កសាងសេដ្ឋកិច្ចដែលធន់ជាងមុន ធ្វើឲ្យហិរញ្ញវត្ថុមានស្ថិរភាព កែលម្អសេវាកម្មសម្រាប់ប្រជាជន និងបង្កើតលក្ខខណ្ឌសម្រាប់អភិបាលកិច្ចប្រកបដោយប្រសិទ្ធភាពនាពេលអនាគត នៅទូទាំងទឹកដីនេះ។

ជាផ្នែកមួយនៃកិច្ចខិតខំប្រឹងប្រែងនេះ ប្រទេសមួយចំនួនរបស់សហភាពអឺរ៉ុប បានចុះហត្ថលេខាលើការចូលរួមវិភាគទានជាង ៨០ លានអឺរ៉ូ (៩២ លានដុល្លារ) ដែលជាផ្នែកមួយនៃការគាំទ្រកាន់តែទូលំទូលាយដោយប្លុកនេះមានទឹកប្រាក់ប្រហែល ១,៦ ពាន់លានអឺរ៉ូ ក្នុងរយៈពេលបីឆ្នាំ ដែលត្រូវបានប្រកាសរួចហើយនោះ។

លោកស្រី Suica បានបញ្ជាក់ថា៖«ការគាំទ្រផ្នែកហិរញ្ញវត្ថុរបស់យើង ត្រូវបានភ្ជាប់ទៅនឹងរបៀបវារៈកំណែទម្រង់អាជ្ញាធរប៉ាឡេស្ទីន ដែលជាការពិតណាស់ ពួកគេបានប្តេជ្ញាអនុវត្ត»។

អាជ្ញាធរប៉ាឡេស្ទីនទទូចថា ខ្លួនត្រូវតែដើរតួនាទីយ៉ាងសំខាន់ ក្នុងការគ្រប់គ្រងតំបន់ហ្កាហ្សា បន្ទាប់ពីសហរដ្ឋអាមេរិក បានសម្របសម្រួលការបញ្ចប់ការប្រយុទ្ធគ្នារវាងអ៊ីស្រាអែល និងក្រុមហាម៉ាស៕