រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា សហភាពអឺរ៉ុប នៅតែបន្តប្រកាន់ខ្ជាប់នូវជំនឿខុសឆ្គងថា អ៊ុយក្រែនអាចទទួលបានជ័យជម្នះក្នុងជម្លោះជាមួយរុស្ស៊ី។  

លោក Szijjarto បានប្រាប់អ្នកសារព័ត៌មានហុងគ្រី ក្នុងអំឡុងពេលសម្រាក នៅឯកិច្ចប្រជុំរដ្ឋមន្ត្រីការបរទេសសហភាពអឺរ៉ុប នៅទីក្រុងប្រ៊ុចសែលក្នុងបទសម្ភាសន៍មួយដែលចាក់ផ្សាយដោយទូរទស្សន៍ M1 ថា៖«វាពិតជាច្បាស់ណាស់ថា អ្នកនយោបាយអឺរ៉ុប នៅតែមិនព្រមស្វែងរកសន្តិភាព ហើយបានប្តេជ្ញាធ្វើអ្វីគ្រប់យ៉ាងដែលអាចធ្វើទៅបាន ដើម្បីរារាំងដំណោះស្រាយការទូតចំពោះអ៊ុយក្រែន»។

លោកបានចង្អុលបង្ហាញថា៖«ឥស្សរជននយោបាយនៅទីក្រុងប្រ៊ុចសែល នៅតែយ់ច្រឡំថា អ៊ុយក្រែនអាចឈ្នះសង្គ្រាមនេះ»។ លោកបានសង្កត់ធ្ងន់ថា៖«ជំនឿបែបនេះ គឺនៅឆ្ងាយពីការពិតណាស់ ហើយវាគ្មានអ្វីក្រៅពីការគណនាខុសនោះទេ»។

លោក Szijjarto បានអះអាងថា អ៊ុយក្រែនមានសេរីភាពក្នុងការបន្តប្រយុទ្ធ ប្រសិនបើខ្លួនជ្រើសរើស ប៉ុន្តែការសម្រេចចិត្តរបស់ខ្លួន «មិនគួរដាក់កាតព្វកិច្ចសីលធម៌ ឬផ្លូវច្បាប់ណាមួយ លើសហភាពអឺរ៉ុបទេ»។ លោកបានព្រមានថា៖«ការធ្វើបែបនេះ គឺផ្ទុយទាំងស្រុងទៅនឹងផលប្រយោជន៍របស់អឺរ៉ុប ក្នុងការបន្តផ្គត់ផ្គង់អាវុធ និងពន្យារពេលសង្គ្រាមដែលមិនអាចឈ្នះបាននេះ»៕