ក្រុមប្រឹក្សាអធិបតេយ្យភាពស៊ូដង់ ដែលដឹកនាំដោយប្រមុខកងទ័ពលោក Abdel Fattah Al-Burhan បាននិយាយថា ខ្លួនមានឆន្ទៈសហការជាមួយសហរដ្ឋអាមេរិក និងអារ៉ាប៊ីសាអ៊ូឌីត ដើម្បីស្វែងរកសន្តិភាពសម្រាប់ប្រទេសនេះ។

នៅក្នុងសេចក្តីថ្លែងការណ៍មួយ ក្រុមប្រឹក្សានេះ បានថ្លែងអំណរគុណដល់ទីក្រុងវ៉ាស៊ីនតោន និងទីក្រុងរីយ៉ាដ ចំពោះ «កិច្ចខិតខំប្រឹងប្រែងជាបន្តបន្ទាប់របស់ពួកគេ ដើម្បីបញ្ឈប់ការបង្ហូរឈាមនៅស៊ូដង់» ហើយបានបង្ហាញពី«ការត្រៀមខ្លួនចូលរួមយ៉ាងសកម្មជាមួយពួកគេ ដើម្បីសម្រេចបាននូវសន្តិភាព ដែលប្រជាជនស៊ូដង់សង្ឃឹមថា នឹងទទួលបាន»។

សេចក្តីថ្លែងការណ៍នេះ បានធ្វើឡើង បន្ទាប់ពីប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងធ្វើការជាមួយអារ៉ាប៊ីសាអ៊ូឌីត អារ៉ាប់រួម និងអេហ្ស៊ីប ដើម្បីបញ្ចប់ជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស ឬ RSF។

នៅក្នុងរដ្ឋធានីបែលហ្ស៊ិក សហភាពអឺរ៉ុបកាលពីថ្ងៃព្រហស្បតិ៍ បានដាក់ទណ្ឌកម្មលើអនុប្រធានកងកម្លាំងគាំទ្ររហ័ស (RSF)ជុំវិញ «អំពើឃោរឃៅដ៏ធ្ងន់ធ្ងរ និងកំពុងបន្ត» បន្ទាប់ពីការដណ្តើមបានកាន់កាប់ទីក្រុង El-Fasher។

កងកម្លាំងយោធាប៉ារ៉ាគាំទ្ររហ័ស (RSF) ដែលបានធ្វើសង្គ្រាមជាមួយកងទ័ពធម្មតា អស់រយៈពេលជាងពីរឆ្នាំ ដណ្តើមយកបានទីក្រុង El-Fasher នៅថ្ងៃទី ២៦ ខែតុលា ដោយបានគ្រប់គ្រងបន្ទាយរឹងមាំចុងក្រោយរបស់កងទ័ព នៅតំបន់ Darfur ភាគខាងលិចប្រទេសស៊ូដង់៕