ក្រសួងពាណិជ្ជកម្មចិន បាននិយាយកាលពីថ្ងៃព្រហស្បតិ៍ (២០ វិច្ឆិកា) ថា កិច្ចសហប្រតិបត្តិការពាណិជ្ជកម្មរវាងចិន និងជប៉ុន ត្រូវបាន "ប៉ះពាល់យ៉ាងធ្ងន់ធ្ងរ" ដោយជំរុញឱ្យនាយករដ្ឋមន្ត្រីជប៉ុន ដកការអត្ថាធិប្បាយរបស់ខ្លួនលើបញ្ហាកោះតៃវ៉ាន់ បើពុំនោះសោតនឹងប្រឈមផលវិបាក។

ជម្លោះការទូតរវាងចិននិងជប៉ុន កាន់តែតានតឹងឡើង ចាប់តាំងពីនាយករដ្ឋមន្ត្រីជប៉ុន លោកស្រី Sanae Takaichi ប្រាប់សភាកាលពីថ្ងៃទី៧ ខែវិច្ឆិកាថា ការវាយក្រសោបរបស់ចិន លើកោះស្វ័យគ្រប់គ្រងតៃវ៉ាន់ អាចបង្កឱ្យមានការឆ្លើយតបខាងយោធាពីទីក្រុងតូក្យូ។

លោកស្រី He Yongqian អ្នកនាំពាក្យក្រសួងពាណិជ្ជកម្មចិន បានប្រាប់សន្និសីទសារព័ត៌មានជាប្រចាំថា "ការលើកឡើងខុសទាំងបើកចំហ របស់នាយករដ្ឋមន្ត្រី Takaichi ទាក់ទងនឹងកោះតៃវ៉ាន់ បានធ្វើឱ្យខូចមូលដ្ឋាននយោបាយនៃទំនាក់ទំនងចិន-ជប៉ុន និងប៉ះពាល់យ៉ាងធ្ងន់ធ្ងរដល់ការផ្លាស់ប្តូរសេដ្ឋកិច្ច និងពាណិជ្ជកម្មទ្វេភាគី"។

យោងតាមទិន្នន័យពាណិជ្ជកម្ម UN COMTRADE របស់អង្គការសហប្រជាជាតិ បានឱ្យដឹងថា ប្រទេសចិនគឺជាទីផ្សារនាំចេញធំទីពីររបស់ជប៉ុន បន្ទាប់ពីសហរដ្ឋអាមេរិក ដោយបានទិញទំនិញជប៉ុនប្រហែល ១២៥ពាន់លានដុល្លារ ក្នុងឆ្នាំ២០២៤ ភាគច្រើនជាគ្រឿងឧស្សាហកម្ម ឧបករណ៍អេឡិចត្រូនិក និងយានយន្តជាដើម៕