ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២០ វិច្ឆិកា) បានវាយប្រហារពាក្យសម្ដីខ្លាំងៗលើសមាជិកសភាមកពីគណបក្សប្រជាធិបតេយ្យ ដែលបានប្រាប់ឱ្យសមាជិកយោធាអាមេរិកបដិសេធរាល់បទបញ្ជាដែលខុសច្បាប់ ដោយហៅអ្នកប្រជាធិបតេយ្យទាំងនោះថាជាជនក្បត់ជាតិ ដែលអាចប្រឈមមុខនឹងទោសប្រហារជីវិត។

លោក Trump បានបង្ហោះបន្តនូវវីដេអូបណ្ដាញសង្គមមួយដែលបង្ហោះកាលថ្ងៃអង្គារ ដោយសមាជិកសភាខាងបក្សប្រជាធិបតេយ្យចំនួន ៦រូបដែលបានបម្រើការក្នុងជួរយោធា ឬស្ថិតក្នុងសហគមន៍ចារកម្មសម្ងាត់។ ប្រធានាធិបតីមកពីបក្សសាធារណរដ្ឋរូបនេះ បានសរសេរក្នុងការបង្ហោះបណ្ដាញសង្គម Truth Social ថា "អាកប្បកិរិយាបំបះបំបោរបែបនេះ ត្រូវទទួលទោសប្រហារជីវិត!"។

ក្រោយមក នៅក្នុងសន្និសីទសារព័ត៌មានមួយ នៅពេលត្រូវសាកសួរថាតើប្រធានាធិបតីចង់ប្រហារជីវិតសមាជិកសភាមែនទេ — អ្នកនាំពាក្យសេតវិមាន លោកស្រី Karoline Leavitt បានឆ្លើយថា "អត់ទេ" ប៉ុន្តែលោកស្រីបានរិះគន់ខ្លាំងៗលើអ្នកប្រជាធិបតេយ្យ ជុំវិញការលើកទឹកចិត្តសមាជិកយោធា ឱ្យប្រឆាំងនឹងបទបញ្ជាបែបនេះ។

គួរឱ្យដឹងថា នៅក្នុងវីដេអូរបស់សមាជិកបក្សប្រជាធិបតេយ្យទាំង ៦រូបនោះ ពួកគេនិយាយចំៗទៅកាន់សមាជិកនៃសហគមន៍យោធា និងចារកម្មសម្ងាត់អាមេរិកថា រដ្ឋបាលលោក Trump កំពុងដាក់ស្ថាប័នទាំងនោះឱ្យប្រឆាំងនឹងប្រជាជនអាមេរិក និងគំរាមកំហែងដល់គោលលទ្ធិនៃរដ្ឋធម្មនុញ្ញអាមេរិក ដោយក្នុងនោះមានការលើកឡើងហាក់ដូចជាជំរុញឱ្យបដិសេធបទបញ្ជា៕