អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី២០ ខែវិច្ឆិកា) បានបង្ហាញនូវក្ដីបារម្ភយ៉ាងខ្លាំងរបស់ខ្លួន ចំពោះការវាយប្រហារតាមអាកាសចុងក្រោយបង្អស់របស់អ៊ីស្រាអែល លើតំបន់ហ្កាហ្សាស្ទ្រីប ដែលបានសម្លាប់ជនស៊ីវិលជាច្រើននាក់ ក្នុងនោះរួមមានទាំងកុមារផងដែរ បើទោះបីជាបទឈប់បាញ់ នៅតំបន់ហ្កាហ្សា ត្រូវបានចុះហត្ថលេខាឲ្យចូលជាធរមាន កាលពីថ្ងៃទី១០ ខែតុលាក៏ដោយ។

អ្នកនាំពាក្យអង្គការសហប្រជាជាតិ លោក Stephane Dujarric បានលើកឡើងនៅក្នុងសន្និសីទសារព័ត៌មានថា៖ «ពាក់ព័ន្ធនឹងតំបន់ហ្កាហ្សាវិញ ខ្ញុំអាចប្រាប់អ្នកទាំងអស់គ្នាថា យើងមានក្ដីបារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែល ដែលយើងបានឃើញ ដោយជនស៊ីវិលត្រូវបានរាយការណ៍ថា បានបាត់បង់ជីវិត និងរងរបួស ក្នុងនោះរួមមានទាំងកុមារផងដែរ កាលពីម្សិលមិញ (ទី១៩ ខែវិច្ឆិកា)»។

អមដោយការកត់សម្គាល់ថា «នេះគឺជាការរំលឹកយ៉ាងជាក់ច្បាស់ អំពីថា តើភាពផុយស្រួយនៃបទឈប់បាញ់ គឺយ៉ាងដូចម្ដេចនោះ» លោក Dujarric បានបញ្ជាក់ថា «អ្វីដែលយើងត្រូវការនោះ គឺគ្រប់គ្នាត្រូវធ្វើយ៉ាងណាធានាឲ្យបានថា បទឈប់បាញ់នៅតែត្រូវបានអនុវត្ត និងបន្តអនុវត្ត»។ ហើយលោកបានសង្កត់ធ្ងន់ថា៖ «ជនស៊ីវិលត្រូវតែត្រូវបានការពារ និងចៀសផុតពីគ្រោះថ្នាក់»។

គួរបញ្ជាក់ថា បើយោងតាមក្រសួងសុខាភិបាល នៅតំបន់ហ្កាហ្សា បានឲ្យដឹងថា កាលពីថ្ងៃពុធ កងទ័ពរបស់ប្រទេសអ៊ីស្រាអែល បានសម្លាប់ជនជាតិប៉ាឡេស្ទីនយ៉ាងតិច ២៥នាក់ និងធ្វើឲ្យរបួសយ៉ាងហោចណាស់ ៧៧នាក់ អំឡុងក្នុងការវាយប្រហារជាបន្តបន្ទាប់លើតំបន់ជាច្រើន ដែលអ៊ីស្រាអែលបានដកចេញនៅមុននេះ ជាអ្វីដែលអាជ្ញាធរប៉ាឡេស្ទីន បានចាត់ទុកថា ជាការរំលោភលើកិច្ចព្រមព្រៀងបទឈប់បាញ់។

ទិន្នន័យពីភាគីប៉ាឡេស្ទីននានា ក្រុមសិទ្ធិមនុស្ស និងស្ថាប័នរដ្ឋាភិបាល បង្ហាញថា អ៊ីស្រាអែល បានធ្វើការរំលោភបទឈប់បាញ់រាប់សិបដង ចាប់តាំងពីកិច្ចព្រមព្រៀងចូលជាធរមាន កាលពីថ្ងៃទី១០ ខែតុលា។ ហើយបើយោងតាមសេចក្តីថ្លែងការណ៍ កាលពីថ្ងៃពុធ ដោយក្រសួងសុខាភិបាលរបស់តំបន់ហ្កាហ្សា បានឲ្យដឹងថា អ៊ីស្រាអែលបានសម្លាប់ជនជាតិប៉ាឡេស្ទីន ២៨០នាក់ និងបង្កឲ្យមានរបួស ៦៧២នាក់ ចាប់តាំងពីថ្ងៃទី១១ ខែតុលាមក៕