បើយោងតាមរបាយការណ៍ថ្មីដ៏ទូលំទូលាយពីអង្គការយូនីសេហ្វ (UNICEF) បានឲ្យដឹងថា កុមារជាង ២០ភាគរយ នៅក្នុងប្រទេសដែលមានប្រាក់ចំណូលទាប និងមធ្យម ប្រឈមនឹងការខ្វះខាតយ៉ាងធ្ងន់ធ្ងរនូវប្រភេទតម្រូវការសំខាន់ៗជាច្រើន រួមមានអាហារូបត្ថម្ភ អនាម័យ លំនៅឋាន និងការអប់រំ។ ការរកឃើញនេះដែលត្រូវបានចេញផ្សាយនៅថ្ងៃប្រារព្ធទិវាកុមារអន្តរជាតិ បង្ហាញពីផលប៉ះពាល់យ៉ាងទូលំទូលាយ ដោយសារកង្វះខាតនៅក្នុងផ្នែកជាច្រើន ដែលប៉ះពាល់ដល់កុមារនៅតំបន់កំពុងអភិវឌ្ឍន៍ទូទាំងពិភពលោក។

របាយការណ៍នេះកំណត់អនុតំបន់សាហារ៉ាអាហ្រ្វិក និងអាស៊ីខាងត្បូងថា ជាបន្ទុកដ៏ធ្ងន់បំផុតនៃកង្វះខាតតម្រូវការចាំបាច់មូលដ្ឋានរបស់កុមារ ដោយប្រទេសឆាដបង្ហាញស្ថិតិគួរឲ្យបារម្ភជាពិសេស ដែលកុមារ ៦៤ភាគរយប្រឈមមុខនឹងការខ្វះខាតធ្ងន់ធ្ងរចំនួន ២ប្រភេទ ឬច្រើនជាងនេះ។ ការវិភាគដែលយកពីទិន្នន័យគ្របដណ្តប់លើប្រទេសជាង ១៣០ បានរកឃើញថា កុមារ ១១៨លាននាក់ ប្រឈមនឹងការខ្វះខាត ៣ប្រភេទ ឬច្រើនជាងនេះ ក្នុងពេលដំណាលគ្នា ខណៈដែល ១៧លាននាក់ ជួបប្រទះនឹងការខ្វះខាតសំខាន់ៗ ៤ប្រភេទ ឬច្រើនជាងនេះ នៅក្នុងតម្រូវការមូលដ្ឋាននេះ។

នាយកប្រតិបត្តិអង្គការ UNICEF លោកស្រី Catherine Russell បានសង្កត់ធ្ងន់ពីផលវិបាកដ៏អាក្រក់នៃកង្វះខាតរ៉ាំរ៉ៃនូវតម្រូវការមូលដ្ឋានរបស់កុមារ ដោយបញ្ជាក់ថា «កុមារដែលធំធាត់ឡើងក្នុងភាពក្រីក្រ និងមិនទទួលបាននូវតម្រូវការសំខាន់ៗគ្រប់គ្រាន់ ដូចជាអាហារូបត្ថម្ភល្អ អនាម័យ និងទីជម្រកសមរម្យជាដើម ធ្វើឲ្យប្រឈមនឹងផលវិបាកដ៏អាក្រក់ ទាំងផ្នែកសុខភាព និងការអភិវឌ្ឍរបស់ពួកគេ»។ លោកស្រីបានជំរុញឲ្យរដ្ឋាភិបាលនានា «ប្តេជ្ញាបញ្ចប់ភាពក្រីក្ររបស់កុមារ ដោយការអនុវត្តគោលនយោបាយប្រកបដោយប្រសិទ្ធភាព» ដោយបន្ថែមថា «វាមិនត្រូវបន្តមានទៀតទេ»។

បើទោះបីជាកម្រិតនៃកុមារដែលប្រឈមនឹងការខ្វះខាតតម្រូវការមូលដ្ឋានធ្ងន់ធ្ងរ បានធ្លាក់ចុះពី ៥១ភាគរយ ទៅ ៤១ភាគរយ នៅចន្លោះឆ្នាំ២០១៣ និងឆ្នាំ២០២៣ ក៏ដោយ ក៏របាយការណ៍បានកត់សម្គាល់ថា វឌ្ឍនភាពបានថយចុះដោយសារកត្តាជាច្រើន រួមមានជម្លោះ បញ្ហាអាកាសធាតុ ការប្រែប្រួលប្រជាសាស្រ្ត ការកើនឡើងបំណុលជាតិ និងការកាត់បន្ថយជំនួយបរទេស។ ហើយជាមួយគ្នានេះ អនាម័យនៅតែជាភាពខ្វះខាតបំផុតគ្រប់ទិសទី ដោយកុមារ ៦៥ភាគរយ ក្នុងប្រទេសដែលមានចំណូលទាប មិនមានលទ្ធភាពប្រើប្រាស់បង្គន់អនាម័យសមរម្យឡើយ៕