រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រាប់សារព័ត៌មាន The Economist ក្នុងបទសម្ភាសន៍មួយថា រុស្ស៊ីបានផ្តល់ការគាំទ្រយ៉ាងច្រើនដល់អ៊ីរ៉ង់ ក្នុងអំឡុងពេលជម្លោះយោធាជាមួយអ៊ីស្រាអែល ក្នុងខែមិថុនា ហើយកិច្ចសហប្រតិបត្តិការការពារជាតិរវាងទីក្រុងមូស្គូ និងទីក្រុងតេអេរ៉ង់ ត្រូវបានជំរុញដោយសង្គ្រាមនោះ។  

លោកបានថ្លែងថា៖«រុស្ស៊ីបានជួយយើងយ៉ាងច្រើន ក្នុងអំឡុងពេលសង្គ្រាម ១២ ថ្ងៃ ហើយបន្ទាប់ពីនោះយើងបានចូលរួមក្នុងកិច្ចសហប្រតិបត្តិការច្រើនជាងមុន ហើយនេះ គឺជាមូលហេតុដែលខ្ញុំកំពុងប្រាប់អ្នកថា យើងកាន់តែត្រៀមខ្លួនខ្លាំងក្លាសម្រាប់ជម្លោះដែលអាចកើតមាន ជាងសង្គ្រាមមុន»។

នៅពេលត្រូវបានស្នើឲ្យពន្យល់ពីអ្វីដែលលោកចង់មានន័យដោយការការត្រៀមខ្លួនខ្លាំងជាងមុន ប្រមុខ ការទូតអ៊ីរ៉ង់រូបនេះ បានឆ្លើយថា៖ «មីស៊ីលរបស់យើងស្ថិតក្នុងទីតាំងល្អជាង ទាំងបរិមាណ និងគុណភាព។ យើងបានរៀនមេរៀនជាច្រើន ក្នុងអំឡុងពេលសង្គ្រាម ១២ ថ្ងៃ។ យើងយល់ពីចំណុចខ្សោយរបស់យើង និងចំណុចខ្លាំងរបស់យើង និងចំណុចខ្សោយរបស់អ៊ីស្រាអែល។ យើងបានធ្វើការលើពួកវាទាំងអស់ ហើយយើងត្រៀមខ្លួនយ៉ាងពេញលេញកាន់តែល្អ ជាងពេលមុន»។

លោកបានលើកឡើងថា៖«នេះគឺមិនមែនមានន័យថា យើងចង់បានសង្គ្រាមនោះទេ។ ដូចដែលអ្នកបានដឹងហើយថា វិធីល្អបំផុត ដើម្បីទប់ស្កាត់សង្គ្រាម គឺចាំបាច់ត្រូវត្រៀមខ្លួនសម្រាប់រឿងនេះ»។

ថ្លែងអំពីកិច្ចសហប្រតិបត្តិការជាមួយទីក្រុងមូស្គូ រដ្ឋមន្ត្រីការបរទេសរូបនេះ បានបញ្ជាក់ថា៖«កិច្ចសហប្រតិបត្តិការយោធារវាងអ៊ីរ៉ង់ និងរុស្ស៊ី មិនមែនជារឿងថ្មីនោះទេ»៕