នាយករដ្ឋមន្ត្រីជប៉ុន លោកស្រី Sanae Takaichi បានច្រានចោលការទាមទារពីប្រទេសចិន ដើម្បីឲ្យដកការអត្ថាធិប្បាយថ្មីៗរបស់លោកស្រី អំពីកោះតៃវ៉ាន់ ដោយបានបញ្ជាក់ថា មិនមានការផ្លាស់ប្តូរនោះឡើយ ចំពោះគោលជំហររបស់ទីក្រុងតូក្យូ អំពីរបៀបដែលខ្លួននឹងឆ្លើយតបទៅនឹងវិបត្តិសន្តិសុខដ៏សំខាន់ ក្នុងតំបន់។

ថ្មីៗនេះ លោកស្រី Takaichi បានក្លាយជាមេដឹកនាំជប៉ុនក្នុងតំណែងដំបូងគេ អស់រយៈពេលជាច្រើនទស្សវត្សរ៍ដែលបានភ្ជាប់ជាសាធារណៈនូវវិបត្តិច្រកសមុទ្រតៃវ៉ាន់ ជាមួយនឹងលទ្ធភាពនៃការដាក់ពង្រាយកងទ័ពជប៉ុន ដោយជំរុញឲ្យមានការឆ្លើយតបយ៉ាងខឹងសម្បា និងការសងសឹកផ្នែកសេដ្ឋកិច្ចពីទីក្រុងប៉េកាំង។

ចាប់តាំងពីពេលនោះមក លោកស្រីបានដាក់កំហិតខ្លួនឯង ចំពោះគោលជំហរមិនច្បាស់លាស់ ដែលត្រូវបានលើកឡើងម្ដងហើយម្ដងទៀតដោយបណ្ដានាយករដ្ឋមន្ត្រីជប៉ុនមុនៗ ហើយអំឡុងពេលនិយាយទៅកាន់អ្នកសារព័ត៌មាននាថ្ងៃសុក្រ (ទី២១ ខែវិច្ឆិកា) នេះ មុនចាកចេញទៅចូលរួមកិច្ចប្រជុំនៃក្រុមប្រទេសមានឧស្សាហកម្មលូតលាស់ទាំង២០ (G20) នៅអាហ្វ្រិកខាងត្បូង លោកស្រីបានបញ្ជាក់ឡើងវិញនូវគោលជំហរនោះ។

នៅពេលត្រូវបានសួរថា តើលោកស្រីមានគម្រោងដកការអត្ថាធិប្បាយដែលធ្វើឲ្យទីក្រុងប៉េកាំងខឹងសម្បាដែរ ឬអត់នោះ លោកស្រីបានឆ្លើយតបថា៖ «ទាក់ទងនឹងស្ថានភាពគំរាមកំហែងដល់អត្ថិភាពរបស់ប្រទេសជប៉ុន រដ្ឋាភិបាលនឹងធ្វើការវិនិច្ឆយគ្រប់ជ្រុងជ្រោយ ដោយផ្អែកលើព័ត៌មានដែលមានទាំងអស់ ដោយពិចារណាពីកាលៈទេសៈជាក់លាក់នៃស្ថានភាពជាក់ស្តែងនីមួយៗ នៅពេលវាកើតមានឡើង»។

លោកស្រីបានបន្ថែមថា៖ «ខ្ញុំខ្លួនឯងផ្ទាល់បានបញ្ជាក់គោលជំហរនេះម្តងហើយម្តងទៀត ក្នុងការឆ្លើយតបរបស់ខ្ញុំ។ គោលជំហររបស់រដ្ឋាភិបាល នៅតែផ្លាស់ប្ដូរឡើយ»។

គួរបញ្ជាក់ថា ជម្លោះជាមួយចិន បានក្លាយជាបញ្ហាប្រឈមផ្នែកការទូតធំដំបូងរបស់លោកស្រី Takaichi ចាប់តាំងពីលោកស្រីបានក្លាយជាមេដឹកនាំជាតិ ក្នុងខែតុលា៕