រដ្ឋបាលអាកាសចរណ៍សហព័ន្ធសហរដ្ឋអាមេរិក កាលពីថ្ងៃសុក្រ បានព្រមានក្រុមហ៊ុនអាកាសចរណ៍ធំៗ អំពី «ស្ថានភាពដែលអាចបង្កឲ្យមានគ្រោះថ្នាក់» នៅពេលហោះហើរលើប្រទេសវ៉េណេស៊ុយអេឡា ហើយបានជំរុញឱ្យក្រុមហ៊ុនទាំងអស់មានការប្រុងប្រយ័ត្ន។

សេចក្តីជូនដំណឹងរបស់រដ្ឋបាលអាកាសចរណ៍សហព័ន្ធដែលបានលើកឡើង អំពី «ស្ថានភាពសន្តិសុខកាន់តែអាក្រក់ និងសកម្មភាពយោធាកាន់តែខ្លាំងឡើងនៅក្នុងឬជុំវិញប្រទេសវ៉េណេស៊ុយអេឡា» និងបាននិយាយថា ការគំរាមកំហែង អាចបង្កហានិភ័យដល់យន្តហោះនៅគ្រប់រយៈកម្ពស់ទាំងអស់។ មានការបង្កើនយោធាសហរដ្ឋអាមេរិកយ៉ាងច្រើននៅក្នុងតំបន់នេះក្នុងរយៈពេលប៉ុន្មានខែថ្មីៗនេះ រួមមានទាំងនាវាផ្ទុកយន្តហោះធំបំផុតរបស់កងទ័ពជើងទឹកសហរដ្ឋអាមេរិក នាវាចម្បាំងយ៉ាងហោចណាស់ប្រាំបីគ្រឿងផ្សេងទៀត និងយន្តហោះ F-35។

រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump បានទម្លាក់គ្រាប់បែកលើទូកដែលតាមការចោទប្រកាន់ថាដឹកគ្រឿងញៀន ចាកចេញពីឆ្នេរសមុទ្រប្រទេសវេណេស៊ុយអេឡា និងប្រទេសអាមេរិកឡាទីនផ្សេងទៀត។ ជើងហោះហើរត្រង់ដោយក្រុមហ៊ុនដឹកជញ្ជូនអ្នកដំណើរ ឬទំនិញរបស់សហរដ្ឋអាមេរិក ទៅកាន់ប្រទេសវ៉េណេស៊ុយអេឡាត្រូវបានផ្អាកចាប់តាំងពីឆ្នាំ២០១៩ ប៉ុន្តែក្រុមហ៊ុនអាកាសចរណ៍អាមេរិកមួយចំនួនហោះហើរលើប្រទេសនេះសម្រាប់ជើងហោះហើរអាមេរិកខាងត្បូង។ ក្រុមហ៊ុនអាកាសចរណ៍ American Airlines (AAL.O) បាននិយាយកាលពីថ្ងៃសុក្រថា ក្រុមហ៊ុនបានបញ្ឈប់ការហោះហើរលើប្រទេសវេណេស៊ុយអេឡាកាលពីក្នុងខែតុលា។ ក្រុមហ៊ុនអាកាសចរណ៍ Delta Air Lines (DAL.N) បាននិយាយថា ក្រុមហ៊ុនបានបញ្ឈប់ការហោះហើរលើប្រទេសវ៉េណេស៊ុយអេឡា «មួយរយៈមកហើយ»។ ក្រុមហ៊ុនអាកាសចរណ៍ United Airlines (UAL.O) ពុំបានធ្វើអត្ថាធិប្បាយភ្លាមៗនោះទេ។ រដ្ឋបាលអាកាសចរណ៍សហព័ន្ធ បាននិយាយថា «ប្រទេសវ៉េណេស៊ុយអេឡា បានធ្វើសមយុទ្ធយោធាជាច្រើនលើកច្រើនសារ និងដឹកនាំការចល័តកងកម្លាំងយោធា និងកងកម្លាំងបម្រុងរាប់ពាន់នាក់» ហើយគ្មានចំណុចណាដែលប្រទេសវេណេស៊ុយអេឡាបានបង្ហាញពីបំណងក្នុងការកំណត់គោលដៅលើអាកាសចរណ៍ស៊ីវិលនោះទេ។